Le Auala e Felagolagomai ai Tagata o le Aiga i le Faia o se Sao Atoatoa—I le Faiva
1 O le ā se isi mea e sili atu ona faamafanafana loto na i lo le vaai atu i tane ma avā, mātua ma fanau o galulue faatasi i le faiva faa-Kerisiano, i le viiaina o le suafa o Ieova i le lautele? (Sala. 148:12, 13) E tatau i aiga uma ona iai sa latou faasologa lelei mo le faia o se sao faifai pea i le auaunaga i le fanua. Pe iai se aso ua faataatia faapitoa e lo outou aiga i vaiaso taitasi ina ia faaaluina i le faiva? Afai o faia faapea, ua iloa lelei lava la e tagata uma le mea e fuafua i ai ma faia ai se sao atoatoa.—Faata. 21:5a.
2 A o lumanai le aso mo le auaunaga a se aiga, aisea e lē avea ai o se galuega fai faatasi le sauniunia o taulimaga a le aiga o le a faaaogaina? O faataitaiga faapena e mafai ona sili ona aogā, ma e mafai ona ati ae ai le agaga moni faaleaiga o le felagolagomai. Maeu le faamanuiaina o le a iai pe afai e avea le faiva i le fanua ma galuegafai a le aiga ma pe a lava saunia tagata uma!
3 Na galulue faatasi se ovasia femalagaai ma se aiga atoa i le galuega mekasini. A o la galulue mai le fale i le fale ma se tasi o teineitiiti, na fesili le teineitiiti ia te ia: “O le ā le umi o le a ta galulue faatasi ai?” Ona ia faamatala ane lea e faapea o loo ia fuafua e galulue faatasi ma lona tamā pe a uma. E matuā manino o loo olioli i laua ma lona tamā i le la auaunaga fai faatasi. Maeu se agaga lelei faaleaiga!
4 O nisi aiga atonu e mafai ona latou paeonia lagolago faatasi i se masina se tasi i le tausaga. Ia pe mafai foi mo se tasi o le aiga ona auauna faifai pea o se paeonia lagolago po o le avea foi ma paeonia sauatoa. O le maopoopo lelei ma le felagolagomai, atonu o le a mafai ai e sui uma o le aiga ona faalauteleina so latou sao i le auaunaga e ala i le lagolagosua i lē o loo paeonia. E mautinoa o le a faamanuiaina le aiga ona o lenei galuega faaopoopo faatasi ai ma mea lelei na tutupu i le faiva e olioli ai.—Mala. 3:10.
5 O le faia o se sao atoatoa i le galuega faaevagelia o le a fesoasoani i le aiga ina ia māfana ai, maelega, fua mai, ma fiafia i le auaunaga ia Ieova!—Faatusatusa i le Filipi 2:1, 2.