Pusa Fesili

◼ Pe e talafeagai ona faapipii a tatou lava tuatusi o imeli i lomiga ia tatou te tufa atu?

Ua tusi pe lolomi e nisi tagata talaʻi a latou tuatusi o imeli i mekasini po o savali ua latou tuu i isi. O i latou e taliaina lomiga e mafai ona faafesootaʻi le tagata talaʻi mo nisi faamatalaga. E lelei ia taumafaiga e fesoasoani ai i ē fiafia. Peitaʻi, ua uma ona tusia i le pito i tua o mekasini ma savali le tuatusi mo le initaneti po o le Web site o loo faaaogā. O lea la, e sili ona lelei pe a lē tusia pe lolomiina a tatou lava tuatusi o imeli i le lomiga.

E faitalia le tagata talaʻi pe tuu i tagata o loo i lana oganuu faamatalaga e faafesootaʻi ai o ia i se isi fasi pepa, aemaise pe a faia se toe asiga. E ao ona tatou taulamua e toe foʻi e asi ē fiafia na i lo le tuu i lo latou faitalia pe faafesootaʻi i tatou mo nisi faamatalaga. E sili atu ona faaalia le naunau moni i le tagata pe a tatou talanoa faafesagaʻi ma i latou.