Aʻoaʻo Tagata Suʻesuʻe e Avea ma Tagata Talaʻi o le Malo
1 E telē le galuega na tuuina atu e Iesu i ona soo e pei ona taʻua i le Mataio 28:19, 20. Na faatonuina soo o Iesu ia faia nisi soo, o ē faaauauina lea galuega. O le a faataatia ai se faavae mo le faalauiloaina o le tala lelei o le Malo o le Atua, a o faagasolo lenei taimi o le iʻuga, lea ua tatou ola ai.—Mata. 24:14.
2 Atonu o ē o loo tatou suʻesuʻe faatasi, o a tatou fanau po o nisi foʻi e fia suʻesuʻe i le Tusi Paia. O lo tatou faanaunauga, ia fesoasoani iā i latou ina ia faatino la latou matafaioi e fesoasoani ai i isi e avea ma soo o Iesu Keriso.—Luka 6:40.
3 Aʻoaʻo i Latou ia Talaʻi Atu: Ia faalaeiau a tatou tagata suʻesuʻe ia taʻu atu i isi mea ua latou aʻoaʻoina, ma faamatala iā i latou mea mananaia na tutupu i le talaʻiga. Ia aʻoaʻo lau fanau mai le taimi a o laiti, ina ia maua le tomai e fai ai le galuega talaʻi, ma ia fua i lo latou matutua. (Sala. 148:12, 13) Ia iloa i au upu ma au mea e fai, e tāua tele iā te oe le talaʻiga.—1 Timo. 1:12.
4 Ua na o i latou e talia ma ola e tusa o taʻiala amiotonu a Ieova, o le a agavaa e fai lana galuega. O le mea moni, e lē tutusa le poto o ē fou ma i latou ua leva, o ē ua tuuina atu ma papatisoina, ae e ao ona talisapaia e i latou o ē fou ia aʻoaʻoga autū o le Tusi Paia, ma ia iloa faamatala. (Tagaʻi i le tusi Faamaopoopo, itu. 79-82.) E ao ona latou auai pea i sauniga, ma vavaeese mai iā “Papelonia Tele,” ma ia lē faia se latou vaega i mataupu faapolitiki.—Faaa. 18:2, 4; Ioa. 17:16; Epe. 10:24, 25.
5 Ia talanoa atu i le ovasia taʻimua, pe afai ua e iloa ua agavaa lau tagata suʻesuʻe e avea ma tagata talaʻi e leʻi papaptisoina. O le a ia faia se fuafuaga e tou te talanoa ma ni toeaina se toʻalua, faatasi ai ma lau tagata suʻesuʻe, ina ia iloa ai po ua agavaa o ia e avea ma tagata talaʻi e leʻi papatisoina, ma galulue faatasi ma le faapotopotoga. O se faaeaga iā te oe le faaauau pea ona aʻoaʻo lau tagata suʻesuʻe a o lua galulue i le talaʻiga.