Ia Faaaogā Lelei Lou Taimi i le Talaʻiga
1 E tele galuega e ao ona faataunuuina i la tatou galuega talaʻi, ae ua itiiti le taimi o totoe. (Ioa. 4:35; 1 Kori. 7:29) O le lelei ona faamaopoopo ma le sauniuni mamao mo le galuega talaʻi, e mafai ai ona tatou faaaogā lelei lo tatou taimi i le talaʻiga.
2 Ia Sauniuni: A o leʻi alu atu i le faatasiga o le talaʻiga, ia vaai po o iai ni au lomiga o le ofo ma ua e lava sauni e taulimaina. A māeʻa loa le tatalo o le faatasiga, ia agaʻi atu loa i le oganuu. O le a mafai ai ona tele se sao e fai i le taimi ua fuafuaina mo le galuega talaʻi.
3 Afai ua tofia oe e taʻimua i le faatasiga mo le talaʻiga, ia amata i le taimi tonu ua fuafuaina. Ia faapuupuu lenā faatasiga, i le va o le 10 i le 15 minute le umi. A o leʻi agaʻi atu i le oganuu, ia faamautinoa ua iloa uma e i latou na auai po o ai lana paga ma le oganuu e galulue ai.
4 I le Taimi o le Talaʻiga: O le taimi lava e uma ai le faatasiga mo le galuega talaʻi, ia aua le talatalanoa ae ō loa i le oganuu. Afai e te manaʻo e vave alu ae leʻi uma le oganuu, atonu e lelei pe a suʻe sau oe lava auala, ina ia aua neʻi vave faauma ai le talaʻiga. Pe a galulue i le oganuu, ia manatunatu i isi o loo faatali iā te oe seʻia uma lau talanoaga o loo fai. Atonu e lelei ona e faia ma le poto le auala e te tuua ai se tagata e finau, po o le fuafua foʻi e toe asi lē na faaalia le fiafia.—Mata. 10:11.
5 I taimi o toe asiga, e lelei ona fai uma asiga o loo iai i le vaipanoa o faia ai asiga, ona faasolo atu lea i isi vaipanoa. O nisi asiga, e lelei pe a telefoni muamua i ai pe faamata e maua atu i latou i le fale. (Faata. 21:5) Afai e te iloa o le a umi le taimi e fai ai sau asiga, ia fai se fuafuaga ina ia mafai e isi o loo tou fai asiga faatasi ona talaʻi i se oganuu e lata ane, pe fai foʻi ni a latou asiga.
6 O loo tatou ola nei i le taimi o le seleselega tele faaleagaga. (Mata. 9:37, 38) Ua toeitiiti faaiʻuina lenei galuega. O lea la, o lo tatou faanaunauga le faaaogā lelei o lo tatou taimi a o auai i le galuega talaʻi.