Ia Fefaalaeiauaʻi a o Auai i le Talaʻiga
1 E tatou te talisapaia uma lava pe a faalaeiauina i tatou i ni “upu ua fai faatatauina.” (Faata. 25:11) Pe a tatou galulue ma isi i le talaʻiga, e faapefea ona faamautinoa o loo faalaeiauina isi i la tatou talanoa?
2 Talanoaga e Faalaeiauina Ai: E mautinoa le faalaeiauina pe a faaaofia ai mataupu faaleagaga i a tatou talanoaga a o auai i le galuega talaʻi! (Sala. 37:30) E mafai ona tatou talanoa i a tatou taulimaga pe taʻu atu ni mea na tutupu lata mai nei i le auaunaga i le fanua na tatou fiafia ai. (Galu. 15:3) Pe na tatou maua se manatu e fiafia ai mai la tatou lava faitauina o le Tusi Paia, mekasini fou, po o sauniga a le faapotopotoga? Tatou te ono talanoa foʻi i ni manatu na taʻua i se lauga i lautele na tatou faalogo ai i le Maota mo Sauniga.
3 Tatou te ono lagona le lotovaivai pe a lāgā mai e se tagata o se aiga se teteega tatou te lē mafai ona faafoe. E mautinoa le aogā o le sema o ni nai minute pe a ō ese mai le fale ae iloiloina faatasi ma lau paga le mataupu ma vaai po o le ā le auala e taulima ai pe a toe tulaʻi mai i le lumanaʻi. Atonu e lelei ona vaai le tusi Reasoning po o Mataupu o le Tusi Paia mo Talanoaga i le Tusi Paia fou. Afai foʻi e te fiafia i se manatu na taʻua e lau paga i lana taulimaga, e mautinoa le faalaeiauina ai pe a e faamālō i ai.
4 Ia Tausolomua Oe: O iai se tasi i la tatou suʻesuʻega tautusi tatou te leʻi galulue i se taimi talu ai nei? O le valaaulia o se tasi tatou te galulue faatasi i le talaʻiga e ono iʻu ai i lo “tatou fefaalaeiauaʻi.” (Roma 1:12) E talisapaia e paeonia sauatoa ma paeonia lagolago pe a iai nisi latou te galulue faatasi, aemaise lava i taeaopō po o le faasolo foʻi ina afiafi, pe afai e tau leai nisi i le talaʻiga. E mafai ona tatou lagolagoina paeonia pe a tatou galulue ma i latou i le talaʻiga. Po o iai se tagata talaʻi e lē atoatoa lona soifua mālōlōina ma tapulaa mea e mafai ona ia faia i le talaʻiga? O le faatulaga o se tagata faapena tatou te galulue faatasi, atonu i le faia o se suʻesuʻega faale-Tusi Paia, e ono aogā iā i tatou uma taʻitoʻatasi.—Faata. 27:17.
5 O le faamālō atu atoa ai ma ni faaupuga o le talisapaia e tele lava ina faalaeiauina ai, e tusa lava pe i ni mea iti. Ia manatua le mea lenā pe a galulue ma isi i le talaʻiga, auā tatou te mananaʻo ina “ia . . . atiaʻe e le tasi le isi.”—1 Tesa. 5:11.