Ia Avea o Sē e Fesoasoani Atu a o Auai i le Talaʻiga

1. O ā aogā e maua pe a galulue ma sau paga i le talaʻiga?

¹ I se tasi taimi, na aauina atu ai e Iesu soo e 70 e talaʻi, ma na ia “aauina atu i latou taʻitoʻalua.” (Luka 10:1) E lē taumatea na fesoasoani lenei faatulagaga i ona soo e fesoasoani ai ma fefaalaeiauaʻi le tasi i le tasi a o alu le latou talaʻiga. Pe afai tatou te galulue faatasi ma isi tagata talaʻi i le talaʻiga, e faapefea ona tatou fesoasoani atu?

2. A o fai le taulimaga a a tatou paga, e faapefea ma aiseā e ao ai ona tatou faalogologo lelei?

² E Ala i le Faalogologo Lelei: Ia faalogologo atu ma le naunau a o fai le taulimaga a lau paga. (Iako. 1:19) A faitau se mau, ia mulimuli ai i lau lava Tusi Paia. Ia tilotilo i le tagata o loo talanoa, po o lau paga po o le tagata o le aiga. Afai e te uaʻi totoʻa atu i le talanoaga, e ono faalaeiauina ai le tagata o le aiga e faia faapea.

3. O afea e ono manaʻomia ai e a tatou paga le fai atu o so tatou sao?

³ E Ala i le Iloa Tonu o le Taimi e Tautala Ai: Afai o loo tatou faatasi ma se tasi o loo fai lana taulimaga, e tatou te faamamaluina o ia i le tuu i ai e tautala muamua. (Roma 12:10) Aua le faasalavei i ai. Afai ua lē mautonu la tatou paga i se tala e fai atu, ia pe ua tetee mai foʻi le tagata o le aiga pe lāgā mai se fesili ma ua talosaga mai la tatou paga mo se fesoasoani, ia taumafai e faaopoopo i manatu o la tatou paga nai lo le faatū atu o se mataupu fou. (Faata. 16:23; Fai. 3:1, 7) Pe a fai so tatou sao, e ao ona lagolago le molimau lea ua uma ona amata atu.—1 Kori. 14:8.

4. O le ā e saosaolaumea i lo tatou fiafia ma le taulau a o auai i le faiva?

⁴ Ina ua uma le talaʻiga a soo e 70, lea na vaevae i paga e 35, na ‘toe foʻi mai ma le olioli.’ (Luka 10:17) E tatou te maua foʻi le fiafia ma taulau manuia i le faiva pe a tatou faalogo lelei ma iloa tonu le taimi e tautatala atu ai e fesoasoani i ē tatou te galulue faatasi mai i lea fale i lea fale.