Polokalame Fou o le Aso Faapitoa o Fonotaga

O le matua o le polokalame o le aso faapitoa o fonotaga o le tausaga faaleauaunaga 2009 o le “Ia Vaavaai Lelei Ina ia Faataunuuina le Galuega,” e faavae i le Kolose 4:17. I le avea ma Kerisiano, e tatou te manatu mamafa i lenā timaʻiga. O lo tatou sini ina ia faaiʻuina la tatou auaunaga e pei ona faia e Iesu. (Ioa. 17:4) Sa faataatia foʻi e le aposetolo o Paulo se faaaʻoaʻoga mataʻina mo i tatou i lea itu. Sa ia finafinau e faaiʻuina lana auaunaga i le molimau atu i le tala lelei.—Galu. 20:24.

O le a faailoa mai e le vaega a le ovasia o le matagaluega le auala na taulimaina ai ma le manuia e nisi tagata talaʻi luʻi i le auaunaga. O le a faamatilatila e le lauga “Ia Galueaʻiina le Mea na E Totōina,” le auala e mafai moni ai ona tatou fesoasoani atu iā i latou “ua saunia o latou loto mo le ola e faavavau.” (Galu. 13:48) O le a iloilo muamua e le failauga asiasi ia fuaiupu taʻitasi o le 2 Korinito 6:1-10, i le lauga “Le Auala ua Tatou Faailoa Atu ai i Tatou o ni Auauna.” O le a ia lauga atu i le aoauli i le matua “Ia Matuā Faatāua Lau Faiva.” E mautinoa lava o le a e maua faalaeiauga mai vaega nei “Ua Olioli Tagata Matutua ma Talavou i le Faiva” ma le “O Talavou o Loo Faataunuuina la Latou Faiva.” O i latou e mananaʻo e faaalia lo latou tuuina atu e ala i le papatisoga i le vai i se tasi o fonotaga a le matagaluega ua lata mai, e tatau ona logoina le ovasia taʻimua i le vave e mafai ai. O se vala o a tatou fonotaga ma tauaofiaga, o le iloiloina lea o Le Olomatamata. Aumai lau kopi o le suʻesuʻega o lenā vaiaso i le aso faapitoa o fonotaga.

Ina ia tulimataʻia ua faaiʻuina la tatou faiva, e tatou te taumafai e faamautinoa e lē o aveesea e mea e tatou te fiafia i ai ma galuega, ia le matafaioi ua tuuina mai e Ieova iā i tatou. O faalaeiauga e maua mai le Tusi Paia i lenei polokalame o aso faapitoa o fonotaga, e tatau ona fesoasoani iā i tatou e talisapaia ai mea e manaʻomia ina ia tumau ai le saʻo o la tatou vaaiga, ma uaʻi atu ina ia faaiʻuina la tatou faiva.