Ia Aʻoaʻo Isi ia Alolofa iā Ieova
1. O le ā na faapogaia ai le toʻatele e faalatalata atu iā Ieova?
1 Po o e manatua le taimi na e faalogo muamua ai lava e uiga iā Ieova? O le ā na māfua ai ona e tosina iā te ia? O le toʻatele o tagata loto faamaoni e latou te tali mai, na latou tosina vavalalata atu i Lē na foafoaina i tatou ina ua latou iloa ona uiga lē mafaatusalia, aemaise lava lona alofa faapelepele.—1 Ioa. 4:8.
2, 3. E mafai faapefea ona tatou faaaogā le tusi Aʻoaʻoga a le Tusi Paia e fesoasoani ai i tagata aʻoga o le Tusi Paia ina ia faateleina lo latou alofa mo Ieova?
2 “O lo Tatou Atua Lenei”: O loo faamatilatila e le tusi Aʻoaʻoga a le Tusi Paia le alofa o Ieova ma le manaʻomia ona iai se faiā patino ma ia. E faapefea ona tatou faaaogā lenei tusi e aʻoaʻo ai isi ina ia faateleina lo latou alolofa i le Atua? Pe a talanoaina se manatu fou, e tatou te ono fai atu ni fesili faatupu manatu, e pei o fesili nei: “O le ā ua taʻu mai iā i tatou e lenei mea moni e faatatau iā Ieova?” o le isi fesili “O faapefea ona faamaonia mai e le manatu lenei o Ieova o le Tamā aupito i sili ona lelei mo so o se tasi? O le aʻoaʻo atu i le auala lenei e mafai ona fesoasoani i le tagata aʻoga e amata se faiā ma Ieova i le olaga atoa.
3 Pe a tatou fesoasoani i tagata aʻoga o le Tusi Paia ia iloa o se matuā faaeaga lava le iloa lelei o le Atua moni e toʻatasi ma o loo soifua o ia, e iʻu ina latou faalauiloa mai e pei o upu a Isaia, “o lo tatou Atua lenei.” (Isa. 25:9) Pe a tatou faamatalaina le Afioga a le Atua, e manaʻomia ona tatou faamamafa le auala o le a manuia ai le fanau a tagata i le faataunuuina o fuafuaga a Ieova e ala i lana pulega tautupu i aao o Keriso Iesu.—Isa. 9:6, 7.
4, 5. O le ā e uiga i ai le alofa iā Ieova?
4 Faamaoniga o le Alofa iā Ieova: Ua tatou iloa o le alofa o se tasi ma lona loto atoa, ola atoa, ma le mafaufau, e tele mea e aofia ai nai lo le iai o ni faalogona malolosi agaʻi i le Atua. E ao ona tatou talia ma tausisi i le auala e silasila ai le Atua i mea. (Sala. 97:10) O le alofa i le Atua e faaalia i le anaana i ana poloaʻiga uma ma faaauau ona auai i “amioga paia ma galuega o le faamaoni i le Atua,” e ui i tofotofoga ma teteega.—2 Pete. 3:11; 2 Ioa. 6.
5 O le faia o le finagalo o le Atua ona tatou te alolofa iā te ia e maua ai le fiafia. (Sala. 40:8) E ao ona malamalama le tagata suʻesuʻe o le Tusi Paia o poloaʻiga uma lava a le Atua ua faatulaga mo le lelei e faavavau o Ana auauna. (Teu. 10:12, 13) Pe a ola e tusa ai ma le taʻitaʻiga a Ieova, e faaalia ai e se tasi lona talisapaia o Ana galuega ofoofogia uma. Fesoasoani i le tagata aʻoga ia malamalama o le savali i ala amiotonu o Ieova e ʻalofia ai e se tasi le tele o puapuaga ma faigatā.
6. O ā faamanuiaga e ono maua e se tasi pe a alofa iā Ieova?
6 Faamanuiaga o i Latou e Alolofa i le Atua: E manatu mamafa moni lava Ieova i tagata lotomaulalo o ē e alolofa iā te ia, ma na te faaalia iā i latou “mea loloto a le Atua.” (1 Kori. 2:9, 10) Ona ua iai se malamalamaga i fuafuaga a Ieova, ua iā i latou se vaaiga manino o le lumanaʻi ma se faamoemoe mautinoa. (Iere. 29:11) O i latou e alolofa iā Ieova ua latou maua lona agalelei lē mafaatusalia. (Eso. 20:6) Ua latou faapelepele i le faamoemoe o le ola e faavavau ona o le tele o le alofa o le Atua iā i latou.—Ioa. 3:16.
7. O le ā sou lagona e uiga i le aʻoaʻo o isi ia alolofa iā Ieova?
7 O le tele lava o lo tatou iloa e faatatau i lo tatou Tamā i le lagi, o le tele foʻi lea o mea e ao ona tatou taʻu atu i isi. (Mata. 13:52) O se matuā faaeaga mamalu lava le avanoa e aʻoaʻo ai isi, aemaise lava a tatou fanau, ina ia alolofa iā Ieova! (Teu. 6:5-7) Tau ina ia puna mai pea iā i tatou ma a tatou tagata aʻoga o le Tusi Paia viiga o Ieova a o tatou maua aogā o le ʻtele o lona agalelei.’—Sala. 145:7.