Pusa Fesili

◼ Pe e mafai e mātua uma e toʻalua ona lipoti le taimi lea e faaalu i le suʻesuʻega a le aiga?

E ui lava o tamā e paʻū i ai le uluulu o le laau i le tausia aʻe o a latou fanau “i aʻoaʻiga ma apoapoaʻiga a Ieova,” ae e tofu sao uma mātua i le toleniina o le la fanau. (Efe. 6:4) O le faalaeiauga lenei a le Tusi Paia i fanau: “Loʻu atalii e, faalogo mai ia i le aʻoaʻo atu a lou tamā; aua foʻi e te tuulafoaʻiina le upu a lou tinā.” (Faata. 1:8) O se tasi o vala tāua o le toleniga a mātua o le suʻesuʻega faale-Tusi Paia.

E oo mai i le taimi nei, e na o le toʻatasi o mātua o lē e faia se suʻesuʻega faaleaiga ma fanau e leʻi papatiso e lipotia le taimi, e tusa lava pe auai uma mātua i le talanoaga. Peitaʻi, ua iai nei se fetuunaʻiga. Afai e tofu sao uma mātua i le aʻoaʻoina o fanau i le taimi o le suʻesuʻega, e mafai la e i laʻua uma ona lipoti e lē silia i le tasi le itula i le galuega talaʻi i vaiaso taʻitasi. E mautinoa lava e sili atu i le itula e tasi e faaalu e mātua i se vaiaso mo le aʻoaʻoina o a latou fanau. O le toleniga o fanau e aofia ai ni taumafaiga faifai pea a mātua uma. (Teu. 6:6-9) O le mea ia manatua, o le lipoti o le auaunaga i le fanua i masina taʻitasi e ao lava ona faaalia ai mea o loo faataunuuina tonu lava i le fanua. O le mea lea, e lē silia i le itula e tasi e ao ona lipotia, e tusa lava pe sili atu i le itula le suʻesuʻega, pe sili atu foʻi i le faatasi ona fai le suʻesuʻega i le vaiaso, pe fai eseese foʻi suʻesuʻega a tamaiti taʻitasi. E na o le toʻatasi o mātua e lipotia le suʻesuʻega faale-Tusi Paia a le aiga ma e na o le tasi foʻi le toe asiga e lipotia i vaiaso taʻitasi e fai ai le suʻesuʻega.