Aʻoaʻo i Latou e Lē Lelei le Faitau
1. O le ā le luʻi tatou te ono fetaiaʻi i le talaʻiga?
1 A o tatou auai i le talaʻiga, e iai taimi tatou te fetaiaʻi ai ma le luʻi o le aʻoaʻoina atu o le upu moni i tagata e lē lelei le faitau. O le ā e mafai ona tatou fai?
2. E faapefea ma aiseā e ao ai ona tatou faaalia le faaaloalo iā i latou e lē lelei le faitau?
2 Faaali i ai le Faaaloalo: E tāua iā Ieova le tulaga o le loto o le tagata, ae lē o le maualuga na oo iai ana aʻoaʻoga faalelalolagi nei. (1 Samu. 16:7; Faata. 21:2) O le māfuaaga lea, e tatou te lē manatu faatauvaa ai iā i latou e lē lelei le faitau. E ono faigofie ona talia e i latou na, la tatou fesoasoani pe a tatou faaalia i ai le faaaloalo ma le onosaʻi. (1 Pete. 3:15) E ono aofia ai i lenei mea le aua le tauanauina le tagata e faitau se mau po o se palakalafa. A o faasolosolo ona aʻoaʻoina e le tagata le upu moni tautele o le Tusi Paia, e ono faaosofia ai lona naunau e faaleleia lana faitau ina ia mafai ai ona maua le fiafia i le faitauina o le Afioga a le Atua ‘ma mafaufau loloto i ai i le ao ma le pō.’—Sala. 1:2, 3.
3. O ā nisi o metotia mo le aʻoaʻo atu e mafai ona faaaogā e aʻoaʻo ai i latou e lē lelei le faitau?
3 O Metotia Eseese e Aʻoaʻo Atu ai a o Faia Suʻesuʻega Faale-Tusi Paia: E aogā tele ata e fesoasoani i lo tatou aʻoaʻoina o tagata ia iloa ma manatua mea ua latou aʻoaʻoina. E te ono fesili i le tagata po o le ā se mea o ia mātauina i le ata o loo i le tusi o loo lua faaaogāina. Ona faaaogā lea o ni fesili patino e fesoasoani i le tagata ia malamalama i le mea o loo aʻoaʻo mai e le ata. Faaaogā mau o loo aʻoaʻoina ai se manatu patino o loo e manaʻo e faamatilatila. E ono mafai foʻi ona faaaogā ata e autalu ai le lesona. Aua le tele naʻuā manatu e talanoaina i taimi e fai ai le talanoaga. Ia faamamafa le matua ma manatu autū o le lesona, ma ʻalofia le talanoaina o manatu e lē fesootaʻi i le lesona o talanoaina. Faitau saʻo mau mai le Tusi Paia, ma faaaogā fesili e faamautinoa ai ua malamalama le tagata aʻoga i mea sa faitauina. O le faia faapea e ono faaosofia ai lona naunau e faaleleia lana faitau ina ia mafai ai ona saʻilia e ia lava isi upu moni o i le Tusi Paia.
4. E tatou te ono fesoasoani faapefea i a tatou tagata aʻoga ia faaleleia la latou faitau?
4 O Fesoasoani Ina ia Faaleleia le Faitau: O tagata e lē lelei le faitau po o i latou e leʻi maua se avanoa e aʻoaʻo ai ia lelei le faitau, e ono faigofie ona malamalama ma manatua faamatalaga. E te ono faalaeiauina i latou faapena e faaaogā lipine ua uma ona puʻeina ai a tatou lomiga. E mafai ona fesoasoani i le tagata ia faaleleia lana faitau pe a faalogologo lelei a o faitau mai, ma mulimuli i le lomiga o loo faitau mai, ia pe toe taʻua foʻi upu i se leo lemū. I nisi vaipanoa, e faatulaga e toeaina ni vasega e aʻo ai le faitau i le faapotopotoga. O fautuaga aogā uma nei e ono fesoasoani iā i tatou, i le fesoasoani atu i ē e lē lelei le faitau ina ia malamalama i “tusitusiga paia,” lea e faapoto ai i latou mo le faaolataga.—2 Timo. 3:15.