Auala e Fesoasoani ai iā i Latou e lē Lelei le Faitau

1. O le ā se luʻi e fesagaʻia ona o le aʻoaʻoina o ē e lē lelei le faitau?

¹ E iai nisi e lē lelei le faitau e fiafia i mea faaleagaga, ae fāʻatu e faitau le Tusi Paia ma isi tusi. Atonu o se luʻi le amataina o se suʻesuʻega ma i latou i le tusi, O ā Aʻoaʻoga Moni a le Tusi Paia? E faapefea la ona tatou avatu le fesoasoani faaleagaga iā i latou na? Na fesiligia ni tagata talaʻi tomai i atunuu e silia ma le 20, i le auala e latou te taulimaina ai lenei tulaga. O nisi nei o auala na latou faataʻitaʻia.

2. O ā meafaigaluega e faaaogā e fesoasoani ai iā i latou e lē lelei le faitau?

² Pe afai o lau tagata aʻoga e lē lelei le faitau pe e lē iloa foʻi faitau, atonu e lelei ona amata i le faaaogāina o se polosiua Ia Faalogo i le Atua po o le polosiua E te Ola e Faavavau pe a E Faalogo i le Atua. Sa faaali atu e se paeonia i Amerika na polosiua e lua i le tagata ma fesili atu i ai, po o le fea o polosiua na e fiafia iai. Na lipotia mai foʻi i le lālā i Kenya le taulau manuia o nei meafaigaluega, ona o le toʻatele o tagata i lenā atunuu e aʻoaʻoina i tala faamatala nai lo o fesili ma tali. E faigofie i le tagata e lelei le faitau ona talia le talanoaga e faafesili ma tali, peitaʻi o lenā auala atonu e lē toʻa ai le tagata e lē lelei le faitau. Pe afai e feoloolo le faitau a lau tagata aʻoga, e lelei la pe a amata i le polosiua o le Tala Lelei Mai i le Atua, po o le E Mafai Ona Avea Oe ma Uō a le Atua!, po o le tusi foʻi o Laʻu Tusi o Tala o Le Tusi Paia.

3. O ā mea e ao ona tatou faia e fesoasoani ai i se isi e lē lelei le faitau?

³ Faamālō atu: O i latou e lē lelei le faitau e masani ona matamumuli ma e faigofie ona lotovaivai. O le mea muamua, ia fesoasoani i le tagata ina ia toʻafilemu. O le toʻatele o tagata e lē iloa faitau e lelei o latou mafaufau ma e mafai ona aʻoaʻoina mea. Ia faaalia le faaaloalo ma faamamaluina i latou i le auala e feutagaʻi ai. (1 Pete. 3:15) O le a uunaʻia ma faamalosia i latou e faaauau pea le suʻesuʻega, pe afai latou te lagonaina o loo taulau a latou taumafaiga ma agaʻigaʻi i luma faaleagaga. O lea, ia faamālō atu ma le agalelei iā i latou.

4. E faapefea ona tatou faalaeiau i latou e lē lelei le faitau e sauni mo le suʻesuʻega?

⁴ E tusa lava pe e lē lelei le faitau a lau tagata aʻoga, ia faalaeiau pea o ia e sauniuni mo le suʻesuʻega. O nisi tagata talaʻi mai i Aferika na faalaeiau i a latou tagata aʻoga, e talosaga atu i nisi o o latou aiga po o uō e lelei le faitau e fesoasoani iā i latou. I Peretania na faalaeiau ai e se tagata talaʻi lana tagata aʻoga e sauniuni lelei. Na ia tuu atu i ai lana tusi ua uma ona suʻesuʻe e na te faaaogāina i ni nai palakalafa o le la suʻesuʻega, e iloa ai le faigofie ona maua o le tali saʻo pe a sauniuni muamua. O se tasi o uso mai i Initia na ia faalaeiauina lana tagata aʻoga, e tilofaʻia ata ma manatunatu loloto i ai mo le la suʻesuʻega o lumanaʻi.

5. E faapefea ona tatou faaalia le onosaʻi a o faia le suʻesuʻega?

⁵ Ia Lava le Onosaʻi: E tusa lava po o le ā le lomiga e faaaogā, ia faamatilatila manatu autū ma fesoasoani i lau tagata aʻoga ina ia malamalama lelei i ai. Atonu i le amataga e lelei le faia o le lua talanoaga i le 10 i le 15 minute. Aua le taumafai e talanoaina ni manatu se tele, ae talanoa na o ni nai palakalafa. Ia onosaʻi pe afai e tuai le faitau a lau tagata aʻoga. A o faasolosolo ona ia atiaʻe lona talisapaia mo Ieova, e mautinoa o le a tinoū o ia e faaleleia lana faitau. Ina ia fesoasoani iā te ia e faia faapea, e lelei pe a valaaulia o ia i le sauniga i le uluaʻi suʻesuʻega.

6. E faapefea ona tatou aʻoaʻo tagata taʻitoʻatasi ia iloa faitau?

⁶ O le a vave le agaʻigaʻi i luma faaleagaga o lau tagata aʻoga pe a lelei lana faitau. (Sala. 1:1-3) E toʻatele ua fesoasoani i a latou tagata aʻoga e aʻo le faitau e ala i le faaaogāina o le lomiga Apply Yourself to Reading and Writing i nai minute pe a māeʻa le suʻesuʻega. Pe a lotovaivai o ia, atonu e mafai ona e atiaʻe lona fiafia e ala i le taʻua o mea ua faaleleia ai lana faitau. Ia faamautinoa i ai e faamanuia Ieova i ana taumafaiga, ma faalaeiau e tatalo atu iā Ieova mo lana fesoasoani. (Faata. 16:3; 1 Ioa. 5:14, 15) O nisi tagata talaʻi i Peretania na latou faalaeiau a latou tagata aʻoga ia fai ni sini faigofie, atonu o le faaleoina o mataʻitusi o le pi faitau, suʻe ma faitau mau filifilia, ma faaaogā lomiga faale-Tusi Paia faigofie e faitau ai. O le aʻoaʻoina o i latou ia iloa faitau, e aofia ai foʻi le faalaeiau o i latou ia iai se faanaunauga e fai ai.

7. Aiseā e lē tatau ai ona faatalatū e faailoa atu le upu moni iā i latou e lē lelei le faitau?

⁷ E manatu mamafa Ieova iā i latou e lē lelei le tulaga tau aʻoaʻoga. (Iopu 34:19) E suʻesuʻe Ieova i loto o tagata. (1 Nofo. 28:9) O lea, aua le faatalatū i le faailoaina atu o le upu moni iā i latou e lē lelei le faitau. E tele meafaigaluega talafeagai lelei e mafai ona e faaaogāina e amata ai se suʻesuʻega. Pe a agaʻigaʻi i luma le tagata aʻoga, e mafai ona sui loa i le tusi o O ā Aʻoaʻoga Moni a le Tusi Paia? ma faalautele lona malamalamaga i le Tusi Paia.