O Tatou o Molimau i Taimi Uma
1. O le ā tatou te aʻoaʻoina mai tala e uiga i le molimau atu o Iesu i le fafine i le vaipuna?
1 Ua tele itula o savali Iesu. Ua lē lavā ma ua fia taumafa i se vai. A o ō atu ona soo e faatau mai ni meaʻai, sa ia faatali i tala ane o se vaipuna i tua mai o le aai o Samaria ma mālōlō ai. E leʻi alu atu Iesu i Samaria e talaʻi ai; sa na ona ui atu ai i lana malaga agaʻi i Kalilaia e faaauau ai lana faiva i inā. Ae ui i lea, na ia faaaogā le avanoa e talaʻi ai i se fafine na alu ane e asu vai. (Ioa. 4:5-14) Aiseā? Sa avea Iesu i taimi uma lava ma “molimau faamaoni ma le moni.” (Faaa. 3:14) Tatou te faaaʻoaʻo iā Iesu i le avea ma Molimau a Ieova i taimi uma.—1 Pete. 2:21.
2. E faapefea ona tatou sauniuni ina ia molimau atu lē fuafuaina?
2 Ia Sauniuni: E mafai ona tatou sauniuni e molimau atu lē fuafuaina e ala i le iā i tatou o ni lomiga i taimi uma. O le toʻatele o tagata talaʻi e faamautinoa ua iā i latou ni sāvali i taimi uma, latou te tuuina i faatauoloa, tagata e faigaluega i pamu kesi, ma so o se isi lava latou te feiloaʻi i ai a o faagasolo le aso. (Fai. 11:6) O se tuafafine e masani lava ona malaga, e na te faamautinoa ua iai sana Tusi Paia laʻitiiti ma le tusi Aʻoaʻoga Moni a le Tusi Paia i lana ato, ona taumafai lea e amata se talanoaga ma tagata e nonofo i ona tafatafa.
3. E faapefea ona tatou ono amataina se talanoaga?
3 Amata se Talanoaga: Pe a molimau atu lē fuafuaina, e tatou te lē amata i le taʻu atu i ai o se mataupu mai le Tusi Paia e talanoaina. E leʻi amataina e Iesu le talanoaga ma le fafine i le vaipuna i le taʻu atu i ai o ia o le Mesia. Sa na ona ia talosaga atu lava mo sina vai e taumafa ai, ae na faapogaia ai le naunau fia iloa o le fafine. (Ioa. 4:7-9) O le auala faapena ua mafai ai e se tasi o tuafafine ona amata se talanoaga pe a fesiligia o ia pe sa fiafia i le faamanatuina o se aso mālōlō. Nai lo le tali atu na te leʻi faamanatuina ona o ia o se Molimau a Ieova, ua ia tali atu, “Ua ou filifili ou te lē faamanatuina.” O le fesili fia iloa e masani ona sosoo mai, o le aiseā, ona maua ai lea e le tuafafine le avanoa e molimau atu ai.
4. Aiseā ua faagaeetia ai oe e le Mataio 28:18-20?
4 E ui ua māeʻa le faiva a Iesu i le lalolagi, ae o loo faaauau pea ona ia naunau mai i le galuega talaʻi ia fai i le auala na ia faia ai. (Mata. 28:18-20) O le mea lea, i le pei o lo tatou Faaaʻoaʻo o Iesu, o i tatou o Molimau o ē e nofo sauni e taʻutaʻu atu lo tatou faatuatua i luma o le lautele i so o se taimi.—Epe. 10:23.