Pusa Fesili
◼ E faapefea ona fesoasoani tagata uma ina ia maua se siʻomaga lelei mo le aʻoaʻoina o mea i sauniga? (Teu. 31:12)
Ona o le faaaloalo loloto iā Ieova ma sauniga a le faapotopotoga e pei ona ia saunia mai, ua faalaeiauina tagata uma ina ia vave ona taunuu ma ia sauniuni e aʻoaʻoina e ia. O se mea lelei tele pe a faaaogā nofoa i le pito i luma o le maota, ae tuu nofoa i le pito i tua mo i latou e iai fanau laiti ma i latou e tuai ona taunuu i nisi o taimi. A o leʻi amataina le sauniga, o i latou uma e iai telefoni ma isi masini faapena e ao ona seti ina ia faamautinoa o le a lē faalavelaveina ai le aofia. O le a faaitiitia ma tau leai ni mea e faalavelaveina ai le uaʻi atu pe a i tagata uma le uiga faaaloalo a o faagasolo le sauniga.—Fai. 5:1; Fili. 2:4.
Pe a amata ona auai mai tagata fou i sauniga, e ao i se tasi o le faapotopotoga e masani ai ona nonofo faatasi ma i latou i le aofia. O le a sili ona lelei lenei faiga pe afai o iai ni fanau laiti e manaʻomia ona toleni lelei. Atonu o le auai i sauniga o se mea e leʻi masani ai le aiga. Afai o le tulaga lea, e mautinoa lava lo latou mananaʻo e nonofo i le pito i tua lea o le a lē faalavelave ai i isi pe a manaʻomia e mātua ona tuua le maota ae agaʻi i fafo pe a iai se mea e manaʻomia e le fanau. (Faata. 22:6, 15) O aiga e iai fanau laiti, e lē tatau ona faanonofo ese i se isi potu lea e ono saʻoloto ai tamaiti e pisa. O le tulaga masani lava e sili ona lelei i mātua ona avatu le aʻoaʻiga ma nisi mea e manaʻomia e tamaiti i fafo, a māeʻa ona toe foʻi mai lea ma le fanau i totonu o le maota.
O le ʻautautua e galulue e faatumauina se siʻomaga talafeagai i le maota mo le tapuaʻiga. E latou te fesoasoani i aiga ma i latou e tuai taunuu i nisi o taimi ina ia maua ni mea latou te nonofo ai. E ao i tautua ona faaalia le magafagafa ma faautauta i le fesoasoani atu i isi ina ia nofoi lelei e aunoa ma se mea e faalavelaveina ai le uaʻi atu o isi tagata o le aofia i le sauniga. Latou te faaaogā le utaga poto pe a taulima se mea e tulaʻi faafuaseʻi mai e ono faalavelaveina ai le sauniga. Pe a oo ina faalavelaveina isi i le pisa o tamaiti, e ao ona fesoasoani atu i ai ma le agalelei le ʻautautua.
O i latou uma lava e auai i sauniga mo le tapuaʻiga e mafai ona saosaolaumea i le mauaina o se siʻomaga lelei, e mafai ona aʻoaʻoina ai e faatatau iā Ieova ma ana fuafuaga mo se lalolagi fou amiotonu ma le amiotonu.—Epe. 10:24, 25.