Le Auala e Toleni ai Tagata Fou e Talaʻi
1. O le a sou lagona i le uluaʻi taimi na e alu ai i le talaʻiga?
1 Po o e manatua le uluaʻi taimi na e talaʻi ai mai i lea fale i lea fale? Atonu na tete lou moa. Pe afai na lua galulue ma lou faiaʻoga o le Tusi Paia po o se isi tagata talaʻi, atonu la na e fiafia i lana fesoasoani. O lea ua e maua le poto masani e avea o se tagata talaʻi, ma e mafai foʻi la ona e fesoasoani atu i isi tagata fou e talaʻi.
2. O ā mea e tatau ona iloa e tagata talaʻi fou?
2 E manaʻomia ona iloa e tagata talaʻi fou le auala e amata ai ni talanoaga ma isi tagata, faitau le Tusi Paia i le fale, faia toe asiga, ma amata ni suʻesuʻega faale-Tusi Paia e faaauau. E tatau foʻi ona latou iloa auala eseese e talaʻi ai, e pei o le molimau atu i ala tetele ma talaʻi atu i tagata i ofisa. E mafai ona e fesoasoani iā i latou e faaleleia o latou tomai i nei vala, e lē gata i au faaaʻoaʻoga a o au fautuaga.
3. E faapefea ona tatou fesoasoani i isi e ala i a tatou faaaʻoaʻoga?
3 Aʻoaʻo Atu e Ala i Faaaʻoaʻoga: Na faataʻitaʻi e Iesu i ona soo le auala e talaʻi ai. (Luka 8:1; 1 Pete. 2:21) Afai o e fuafua e talaʻi ma se tagata fou, ia sauniuni se taulimaga faigofie e mafai ona faataʻitaʻi i ai le tagata fou, atonu e faaaogā se taulimaga o loo maua i a tatou lomiga. Ona fai atu lea o le a e faia le fale muamua ma lona lua, ina ia faalogo i ai le tagata fou i au tala e fai atu. A o ō atu i le isi fale, e lelei pe a e fesili atu pe na iai ni mea na ia mātauina i lau taulimaga. O le faia faapea, o le a fesoasoani e na te iloa ai le tāua o le galulue ma isi i le faiva, ma faigofie ai ona talia so o se fautuaga e te avatu pe a uma lana taulimaga.
4. E faapefea ona tatou fesoasoani i le tagata fou pe a uma ona faalogologo i lana taulimaga?
4 Fai Atu ni Fautuaga: Na fai atu foʻi e Iesu ni fautuaga i ona soo i le auala e talaʻi ai. (Mata. 10:5-14) O lenā auala e mafai ona fesoasoani ai i se tagata talaʻi fou. Afai ua oo i le taimi e fai ai lana fale, ia e faalogologo lelei. Pe a lua ō ese mai le fale, ia avatu se faamālō māfana e tusa lava pe na e mātauina ni mea e manaʻomia ona faaleleia i lana taulimaga. A o leʻi fai atu se fautuaga, faatali seʻi iloa po ua faaleleia lana taulimaga i le isi fale. E lē taumatea ai o lona tete. Ia manatua foʻi e lē tutusa tomai o tagata talaʻi uma, ma e lē tasi se auala saʻo e faia ai se mea.—1 Kori. 12:4-7.
5. O ā mea e mafai ona tatou fai atu ai pe a avatu ni fautuaga?
5 I nisi taimi, atonu e fesili atu ai iā te oe se tagata fou mo ni fautuaga. Ae afai e lē fesili atu o ia, ia tausolomua oe ona fesoasoani iā te ia. E faapefea ona faia ma le agalelei lenei mea? O nisi tagata talaʻi tomai e na ona fai atu lava, “E mafai ona fai atu saʻu fautuaga?” pe, “O le ā sou manatu, na e fiafia i lau taulimaga?” Pe e te fai atu e faapea, “Ina ua faatoʻā ou talaʻi, na ou iloa e faigatā . . . , ae na fesoasoani mai iā te aʻu le mea lenei . . .” I nisi taimi e aogā le suʻe faatasi i manatu mai i La Tatou Faiva o le Malo. Ina ia lē lofituina o ia, ia avatu ni fautuaga i le na o se vala e tasi o lana taulimaga.
6. I le faiva, e faapefea ona “faamaʻai le uʻamea i le uʻamea”?
6 E Faamaʻai le Uʻamea i le Uʻamea: Na faalaeiau e Paulo Timoteo o se faievagelia tomai ina ia faaauau ona aʻoaʻo atu ma ia agaʻigaʻi i luma. (1 Timo. 4:13, 15) E ui e foliga mai e tele tausaga talu le taimi muamua na e alu ai i le faiva, ae e tatau ona taumafai pea e faaleleia lou tomai. Ia aʻoaʻo mai i le ʻautalaʻi o loo tou galulue, e oo lava iā i latou e itiiti le tomai i le faiva, ma ia mataalia e fesoasoani atu ma le agalelei i isi, aemaise i ē fou ina ia avea ma tagata talaʻi tomai o le tala lelei.—Faata. 27:17.