Auai ma le Loto Atoa i le Faiva i le Fanua
Vaega 3: Saosaolaumea i le Agaʻi i Luma o Isi
1 Ua masani lava ona sii mai le faiā i le va o le uso matua o Paulo ma le taulealea talavou tuutoina o Timoteo, o se faaaʻoaʻoga lelei i le toleniina mo le faiva. (1 Kori. 4:17) Sa faatonuina e Paulo Timoteo ina ia faasoa atu i isi le poto ma le toleniga lava lea e tasi na ia maua. (2 Timo. 2:1, 2) E tatau foi ona tatou mulimuli i lena auala e tasi i le faapotopotoga i aso nei.
2 Toleni Isi: Ua manino mai se manaoga mo le toleniga pe afai tatou te manatu i le oganuu a le Lala i Samoa i Sisifo, e tusa ma le 200 tagata talaʻi faaopoopo ua iai nei i lo le mea sa iai i le tolu tausaga ua mavae. E matuā foliga mai o le toatele o i latou ia o le a maua aogā mai le toleniga e mafai ona avatu e tagata talaʻi agavaa. O se tasi o tuafafine o lē e masani ona faaaluina na o se itula e tasi pe lua i le auaunaga i le fanua i le masina, sa aʻoaʻoina e tautala ma le uigā ina ua fesoasoani i ai se tagata talaʻi agavaa. Sa mou atu lona faatautū i le taimi muamua e auai i le faiva, ma na oo ai ina avea o ia o se tagata talaʻi maelega o le tala lelei. I le avea nei o ia ma paeonia agaʻigaʻi i luma, ua ia faapea mai ina ua toe tepa i tua: “Na pau lava le mea sa ou manaomia o le aʻoaʻoina i le mea e ao ona taʻu atu, ona amata ai loa lea ona ou olioli i le faiva.”
3 Afai o oe o se toeaina, se auauna o le faiva, se paeonia, po o se tagata talaʻi agavaa, e mafai faapefea ona e saosaolaumea i le agaʻigaʻi i luma o isi? O le laasaga muamua o le faailoa lea i le taʻitaʻi o lau Suesuega Tau Tusi a le Faapotopotoga faapea e te fiafia e fesoasoani i se isi tagata talaʻi.
4 Ia Faamaopoopo ma Sauniuni: E fesoasoani tele le faia o se fuafuaga maʻoti ina ia galuue faatasi. Atonu e lē toʻa pe lē mautonu foi lau soa ia te ia lava i le amataga, ae o le a ia talisapaia le iloa o loo iai se tasi o loo galulue faatasi ma ia e fesoasoani atu pe afai e tulaʻi mai se manaoga. (Fai. 4:9) Afai e mafai, ia filifili se oganuu e foliga mai lua te maua i ai ni tagata o ē e loto malilie e felafolafoai i ni manatu faale-Tusi Paia. O le a fesoasoani lenei mea i lē fou ina ia faia ai se sao ma faapea ona maua ai le toʻa.
5 Ina ia faaauau le toleniga agaʻigaʻi i luma o le a aogā ona talanoaina le auala e faia ai se toe asiga i ē naunau na maua. E aofia i lena le faataatia o le faavae i le uluai asiasiga e ala i le tuua o lē ona le fale ma se fesili ina ia taliina pe a lua toe foi atu. Ia mautinoa ua fesoasoani i le tagata talaʻi e itiiti le poto masani e sauniuni, ona ō faatasi lea ma ia i le asiasiga. Afai e amata se suesuega ae o loo tumau pea ona lē mautonu le tagata talaʻi fou i lona lava tomai, atonu e lelei ona faafoe e le tagata talaʻi e sili atu ona agavaa le suesuega mo sina taimi, seia oo ina agavaa le tagata talaʻi fou na te tauaveina.
6 Ona o le faanatinati o le gasolo mai o ē fou i le faalapotopotoga, e matuā manino lava la le atamai o le saunia o se faiga malosi tau aʻoaʻoga i le faiva i le fanua. E manaomia le fesoasoani mai ia i latou o ē ua uma ona atiina aʻe o latou tomai i le galuega talaʻi. Afai e mafai ona e fesoasoani i se tasi, i se taimi, o le a avea foi o ia o sē “ua mafaia ona aʻoaʻoina atu i nisi.”—2 Timo. 2:2.