Pe e Lelei Lau Vaai?
1. O le ā le uiga, ia “lelei le vaai”?
1 O mea e taulaʻi i ai la tatou vaai, e taaʻina ai a tatou mea e fai. Ua talafeagai lelei fetalaiga a Iesu: “Pe afai e lelei lau vaai, e malamalama uma ai lou tino”! (Mata. 6:22) Pe a “lelei” la tatou vaai faaleagaga, e taulaʻi i le mea e tasi, o le faia lea o le finagalo o le Atua. E tatou te faamuamua le Malo ma lē taaʻina ese i meafaitino e lē manaʻomia, po o mea e faalavelave i le talaʻiga.
2. O le ā e mafai ona faasesēina ai o tatou manatu, ae o le ā e fesoasoani iā i tatou?
2 Iloilo Oe Lava: E mafai ona faasesēina o tatou manatu i faasalalauga faapisinisi, ma meafaitino e maua e isi. A o leʻi faia se mea po o se faatauga e tele le taimi, tupe ma le malosi e alu ai, e lelei ona “faitau tupe o le a faaalu” ai i le fesili ifo, ʻPo o le a faaleleia e lenei mea laʻu auaunaga iā Ieova, pe faalavelavea ai?’ (Luka 14:28; Fili. 1:9-11) E lelei foʻi ona iloilo mai i lea taimi i lea taimi, le auala e faafaigofie atili ai o tatou olaga ina ia tele se sao i le faiva.—2 Kori. 13:5; Efe. 5:10.
3. O le ā se mea ua tatou iloa mai i se tuafafine na faia ni fetuunaʻiga e faafaigofie ai lona olaga?
3 Ina ua paeonia sauatoa se tasi tuafafine, sa filifili e faigaluega pea i lana galuega sauatoa, e ui e lava se tupe mai i se galuega faavaitaimi e tausi ai ona manaʻoga. Ae na ia manatu mulimuli ane: “E lē mafai ona pologa se tasi mo ni matai se toʻalua. E tatau ona tuu mea ou te manaʻo i ai, ae fai na o mea ou te manaʻomia. Na ou iloa e oo ina pala meafaitino, ma e na o loʻu vaivai ai pe a taumafai e saʻilia na mea.” Sa mafai ona fetuunaʻi lona tulaga ia faafaigofie ai lona olaga ma sui lana galuega, ma faaauau ai pea ona paeonia.
4. Aiseā ua faanatinati ai ona tumau pea le lelei o le vaai i le taimi nei?
4 O le faanatinati o o tatou taimi, ua tāua ai lava le tumau pea ona lelei o le vaai. O le mavae atu o aso taʻitasi, o lo tatou tulata atu foʻi lea i le iʻuga o lenei faiga o mea ma le amataga o le lalolagi fou a le Atua. (1 Kori. 7:29, 31) O le uaʻi atu i le galuega talaʻi, e mafai ona faasaoina ai i tatou lava atoa ma ē o loo faalogo mai iā i tatou.—1 Timo. 4:16.