Po o Lava Aʻu Taumafaiga?

1. O ā atugaluga atonu e lagona e se Kerisiano faamaoni?

¹ Po ua e fesili ifo lava oe i lenei fesili? Atonu ua e lotovaivai ona ua lē o toe tutusa lou sao e faia i le talaʻiga, ona ua e matua ma lē lelei lou soifua mālōlōina, po ua tele foʻi tiutefai i le aiga. Na tusi mai se tuafafine e toʻatolu lana fanau, o nisi taimi e lagona lona leaga ona ua tele le taimi ma le malosi e alu i le tausia o lana fanau ma ua itiiti ai mea e na te mafaia i le talaʻiga. Ae o le ā e aogā iā i tatou ina ia maua ai se vaaiga paleni?

2. O le ā e faafinagaloina e le Atua mai iā i tatou?

² Le Mea e Faafinagaloina e Ieova: E tatou te mananaʻo uma ia tele mea e fai i le auaunaga. O lea uiga, e iloa ai e tatou te lē o faapalapala. Ae, e iai le eseesega o mea e tatou te mananaʻo e fai ma mea e tatou te mafaia. Ia tatou manatua, o loo silafia lelei e Ieova le mea e gata ai lo tatou malosi ma e lē finagalo o ia e tatou te faia mea e tatou te lē gafatia. (Sala. 103:13, 14) O le ā la e faafinagaloina e le Atua mai iā i tatou? Ia tatou auauna atu ma le lotoatoa ma fai le mea sili e tatou te mafaia.—Kolo. 3:23.

3. E faapefea ona tatou iloilo mea o tatou mafaia i le auaunaga?

³ E faapefea ona tatou iloa tonu mea e tatou te mafaia? Ia tatalo iā Ieova e fesoasoani mai ia tatou iloa lelei o tatou tulaga. (Sala. 26:2) E aogā foʻi ona fai i se uō e taʻumatuaina ma iloa lelei i tatou, e taʻu saʻo mai se mea o manaʻomia ona faaleleia i la tatou auaunaga. (Faata. 27:9) E aogā foʻi ona toe iloilo o tatou tulaga mai i lea taimi i lea taimi, ona e fesuisuiaʻi le olaga.—Efe. 5:10.

4. O le ā le vaaiga e ao ona iā i tatou i faamanatu mai le Tusi Paia e uiga i le galuega talaʻi?

⁴ Le Vaaiga Saʻo i Faamanatu: E masani ona valaau atu le ʻautapuaʻi i ē o loo tamomoʻe i se tuuga, ia faamalolosi. O lo latou sini, e lē o le faalotovaivaia o le ʻautamomoʻe ae o se faalaeiauga ia oo i le tini. O lea, o faalaeiauga ma faamanatu mai i le Tusi Paia e ala mai i a tatou sauniga ma lomiga ia faanatinati ona talaʻi le upu, e mo lo tatou lelei ae e lē faapea ua lē lava a tatou taumafaiga. (2 Timo. 4:2) E mautinoa afai e tatou te taumafai pea e fai le mea sili e mafaia, o le a manatua e Ieova lo tatou ‘⁠alofa ma a tatou galuega.’—Epe. 6:10.