Le Mana o le Tusi Paia e Suia ai Lou Olaga

E faitau miliona tagata ua fesoasoani i ai le Tusi Paia e faaleleia o latou olaga. O ā nisi o mataupu silisili o le Tusi Paia a faatatauina, e aogā i le foʻiaina o o tatou faafitauli i aso nei? E lē taumatea e te fia iloa le tali o lenei fesili e ala i le matamata i le vitiō lona lua, The Bible—Its Power in Your Life, o vitiō e tolu o le DVD, The Bible—A Book of Fact and Prophecy. Pe a uma ona matamata i lenei vitiō, tali fesili nei.

(1) Aiseā ua sili ai le Tusi Paia i lo o se tusi manaia ua tusia e tagata? (Epe. 4:12) (2) Aiseā ua tele ai faafitauli o tagata pe afai e mafai e le Tusi Paia ona faaleleia o latou olaga? (3) O le ā le matua o le Tusi Paia? (4) O ā mau o le Tusi Paia o loo sii mai e mafai ona fesoasoani i ulugalii faaipoipo (a) e sologa lelei ai a latou talanoaga (e) ma pulea ai le ita? (5) E faapefea i le vaaiga a se Kerisiano i le faaipoipoga, ona faaleleia ai le olaga faaleaiga? (Efe. 5:28, 29) (6) Ua faapefea ona faia e Ieova se faaaʻoaʻoga lelei mo mātua? (Mare. 1:9-11) (7) E faapefea ona faia e mātua le suʻesuʻega a le aiga o se mea e fiafia ai? (8) E ese ai mai le suʻesuʻega a le aiga, o ā isi mea ua uunaʻia e le Afioga a le Atua mātua ia saunia mo a latou fanau? (9) O le ā le fautuaga a le Tusi Paia ua fesoasoani i aiga ia ola ai e tusa ma mea ua latou maua? (10) O ā taʻiala mai i le Tusi Paia e faatatau i le tumamā, le faaaogā sesē o fuālaau faasāina, le ʻava malosi, atoa ma mafatiaga o le mafaufau, a faatatauina o le a faaitiitia ai faafitauli o le soifua mālōlōina? (11) O ā folafolaga a le Tusi Paia e aogā e faatumauina ai i tatou? (Iopu 33:25; Sala. 145:16) (12) Ua faapefea ona faaleleia lou olaga e aʻoaʻoga a le Tusi Paia? (13) E faapefea ona e faaaogā lenei vitiō e fesoasoani ai i isi?