Ia “Māfana lo Outou Alofa”
1. O le ā ua matuā manaʻomia e tagata i aso nei?
1 E leʻi iai se taimi muamua i le talafaasolopito o le fanau a tagata, ua sili ona latou manaʻomia ai se fesoasoani alofa. Ona ua faasolo ina matuā leaga le tulaga o mea i le lalolagi, ua iʻu ai ina salalau atu faalogona o le lē fiafia, atuatuvale, ma le leai o se faamoemoe. Ua manaʻomia ai e le faitau miliona le fesoasoani, ma ona o tatou o ni Kerisiano, ua iā i tatou le avanoa e faaalia ai le manatu mamafa moni i o tatou tuaoi. (Mata. 22:39; Kala. 6:10) E mafai faapefea ona faaalia lenei manatu mamafa?
2. O le ā le auala sili e tatou te faaalia ai le alofa mutimutivale?
2 O Galuega o le Tigā Alofa: E leai se faamāfanafanaga moni ma tumau, pe a lē mai i le Atua. (2 Kori. 1:3, 4) Ua uunaʻia i tatou e Ieova e faataʻitaʻi iā te ia, e ala i le ʻmāfana o lo tatou alofa,’ ma ua ia faatonuina i tatou e asiasi atu i o tatou tuaoi ma le tala lelei o le Malo. (1 Pete. 3:8) O lo tatou auai ma le maelega i lenei galuega, o se auala sili lea tatou te faamāfanafana ai iā i latou “ua loto momomo,” ma ua na o le Malo o le Atua, le faamoemoe moni o le fanau a tagata o loo puapuagatia. (Isa. 61:1) Ona o lona alofa mutimutivale mo ona tagata, e lē o toe mamao la ona gaoioi lea o Ieova e tafiesea ē amioleaga, ae faavae se lalolagi fou amiotonu.—2 Pete. 3:13.
3. E faapefea ona tatou vāai i tagata e pei o le silasila a Iesu?
3 Vaai i Tagata e Pei o le Silasila a Iesu: Tusa lava pe talaʻi Iesu i se faapotopotoga o tagata e toʻatele, ae e silafia e ia manaʻoga faaleagaga o tagata taʻitoʻatasi. E pei i latou o ni mamoe e leai se leoleo mamoe e taʻitaʻia. Na pāʻia lona finagalo i mea na ia vaaia, ma na uunaʻia ai o ia e aʻoaʻo atu ma le onosaʻi. (Mare. 6:34) Pe a tatou vāai i tagata e pei o le silasila a Iesu, o le a uunaʻia ai la i tatou, e faaalia le alofa mutimutivale moni mo i latou taʻitoʻatasi. E faaalia lenei i le auala tatou te tautatala ai ma foliga vaaia. O le a faamuamua la tatou galuega talaʻi, ma filifili ma le faaeteete upu tatou te faaaogā, ina ia ōgatusa ma manatu o tagata taʻitoʻatasi.—1 Kori. 9:19-23.
4. Aiseā e tatau ai ona tatou oofu i le alofa mutimutivale?
4 Ua tali lelei mai le motu o tagata e toʻatele i le feʻau o le Malo, ma lo tatou naunau moni o loo faaalia iā i latou. A o faaauau ona tatou oofu i le alofa mutimutivale, o le a faamamaluina ma faafiafia ai lo tatou Atua alofa mutimutivale, o Ieova.—Kolo. 3:12.