ʻIa Faapaiaina le Suafa o le Atua’
1. O le ā le matua o le Fonotaga Matagaluega mo le tausaga faaleauaunaga e 2012, ma o fea e faavae mai ai?
1 Maʻeu se faaeaga o le tauaveina o le suafa o Lē e Pule Silisili Ese o Ieova! O Ieova lava ia na tuuina mai lenā suafa e tatou te tauaveina, aemaise lava talu mai le 1931, i le avea ma Molimau a Ieova, ua mātaulia ai i tatou i lenā igoa e tutasi. (Isa. 43:10) Na matuā faapaiaina e le Alo e toʻatasi o le Atua o Iesu le suafa o le Atua, e ala i le faamuamua i lana tatalo faaaʻoaʻo lea na ia faatonuina ona soo e tatalo ai. (Mata. 6:9) O le matua autū o le polokalame o le Fonotaga Matagaluega mo le tausaga faaleauaunaga e 2012, e faavae mai i upu a Iesu. O lona matua e faapea, “Ia Faapaiaina le Suafa o le Atua.”
2. O ā faamatalaga o loo tatou aloalo atu e faalogologo i ai?
2 Mea o le a Tatou Faalogo i ai: I le lauga i le Aso Toonaʻi “Ia Faalauiloa le Suafa o le Atua o ni Auauna Faataimi Atoa,” o le a talanoaina ai le avea o le auaunaga faataimi atoa, o se olaga e tauia. O le a tatou faalogo ai foʻi i le lauga faasolo o lona matua, “Ia Faaeteete Neʻi Faalumaina le Suafa o Ieova,” lea e fesoasoani iā i tatou e ʻalofia le ono maileia i togafiti leaga e fā. O fesili nei o le a taliina i le lauga ua faamatuaina “Aiseā e Tatau ai Ona Faapaʻiaina le Suafa o le Atua.” O le ā e fesoasoani iā i tatou e talaʻi ai ma le maelega, pe afai e lē naunau mai tagata? ma, O le ā e fesoasoani iā i tatou ina ia uigā ai la tatou faiva? I le lauga faasolo e fā ona vaega i le Aso Sa, o le a tatou olioli ai e faalogologo atu po o le a faapefea ona tatou Faapaiaina le suafa o le Atua, e ala i o tatou manatu, tautala, faaiʻuga ma a tatou amio. O le a talisapaia foʻi e tagata fou le lauga lautele e faapea, “O le a Faapaiaina e Ieova Lona Suafa Silisili iā Amaketo.”
3. O le ā le faaeaga ua tatou maua, ma o le a faapefea ona fesoasoani le polokalame iā i tatou?
3 E lē o toe mamao se taimi, ona gaoioi lea o Ieova e faapaiaina lona suafa. (Eseki. 36:23) I le taimi e tasi, ua iā i tatou foʻi se faaeaga faapitoa o le faasilisilia o le suafa paia o Ieova. E tatou te mautinoa o le a fesoasoani le polokalame o le Fonotaga Matagaluega iā i tatou, e faataunuu ai lo tatou tiute tauave e sili ona tāua, o ni ē e tauaveina le suafa o le Atua.