ʻIa faia le finagalo o le Atua’

1. O le ā le matua o le polokalame o le aso faapitoa o le fonotaga, mo le tausaga faaleauaunaga 2012, ma aiseā e tāua ai le talanoaina o lenei mataupu?

¹ Na foafoaina i tatou ona o le finagalo o Ieova. (Faaa. 4:11) Peitaʻi, e faigatā ona tatou faataunuu fuafuaga o o tatou olaga, pe a aunoa ma le aʻoaʻoina ma faia le finagalo o le Atua. E lē faigofie e pei ona tatou iloa, talu ai o loo tatou tau ma faanaunauga i totonu e faia ʻmea e manaʻo i ai le tino atoa ma le mafaufau’ po o le faia foʻi o ʻmanaʻoga o tagata o le lalolagi.’ (Efe. 2:3; 1 Pete. 4:3; 2 Pete. 2:10) A aunoa ma le fesoasoani a le Atua, e tatou te ono aafia e ala i le “puʻe ola [e Satani] . . . . ina ia fai lona loto.” (2 Timo. 2:26) O le polokalame o le aso faapitoa o fonotaga mo le tausaga faaleauaunaga 2012, o le a fesoasoani iā i tatou taʻitoʻatasi ia ōgatusa a tatou galuega ma le mea tāua lona tolu lea na taʻua e Iesu i lana tatalo faaaʻoaʻo, ia “faia lou finagalo.”—Mata. 6:9, 10.

2. O ā fesili o le a taliina a o faagasolo le polokalame?

² Fesili o le a Taliina: A o e faalogologo i le polokalame, vaai po o ā tali o fesili nei: O le ā se isi mea tāua e tatau ona tatou faia, e ese mai i le faalogologo i le Afioga a le Atua? E mafai faapefea ona tatou faaauau pea ona malamalama i le finagalo o le Atua mo i tatou? Aiseā e manaʻomia ai ona tatou lotomalilie e fesoasoani atu i so o se ituaiga o tagata? E faapefea ona tatou maua se olaga lelei ma faamalieina? Talavou e, o le ā e tatau ona e faia ina ia fiafia ai Ieova iā te oe? O le ā le taui e maua pe a e faia le finagalo o le Atua? Aiseā ua faanatinati ai ona tatou atiaʻe ma faalaeiau isi?

3. E faapefea ona tatou maua le tele o aogā atoatoa mai i lenei sauniuniga faaleagaga?

³ Ia mautinoa ua e auai ma ia uaʻi lelei atu i le polokalame. O se sui mai i le Peteli po o se ovasia femalagaaʻi, e ono auai e fai ma sui o se failauga asiasi mai. A o leʻi amata pe faaiʻu foʻi le polokalame, ia naunau e talanoa atu iā te ia ma lana avā pe afai ua faaipoipo. Pe a e toe foʻi atu i le fale, aua neʻi avea oe ma lē e ʻfaalogologo ma faagalogalo,’ ae ia autalu ma le aiga le polokalame, ma talanoa le auala e mafai ai ona ōgatusa a tatou gaoioiga, ma le finagalo lelei atoatoa o le Atua.—Iako. 1:25.

4. Aiseā e tāua ai le faamuamua o le faia o le finagalo o le Atua?

⁴ E lē o toe mamao se taimi, ona faaumatia loa lea o i latou o loo tuliloaina pea o latou faanaunauga, ma mumusu e ola e ōgatusa ma le finagalo o Ieova. (1 Ioa. 2:17) O lea la, tatou te loto faafetai ai iā Ieova i le saunia o nei polokalame i le taimi tatau, e fesoasoani iā i tatou e faamuamua le faia o le finagalo o le Atua!