Ua Toleniina i Tatou e Ieova mo Lenei Galuega
1. Pe a tuuina atu e Ieova ni tofiga i tagata, o le ā se isi mea na ia faia?
1 Pe a tuu atu e Ieova ni tofiga i tagata, e na te avatua foʻi ma ni fesoasoani e manaʻomia e faataunuu ai na tofiga. O se faaaʻoaʻoga, ina ua poloaʻi atu Ieova iā Noa ia fau se vaa, o se mea e leʻi faia muamua e Noa, na Ia taʻu atu foʻi le auala e faia ai. (Kene. 6:14-16) Ina ua tofia le leoleo mamoe agamalu o Mose e alu atu i toeaina o Isaraelu ma Farao, na faamautinoa atu e Ieova iā te ia: “Ou te fesoasoani iā te oe pe a e tautala, ma aʻoaʻo atu foʻi iā te oe i upu e te tautala ai.” (Eso. 4:12) Ma i lo tatou tofiga e talaʻi le tala lelei, e leʻi tuulafoaʻia lava i tatou e Ieova. Ua ia toleniina i tatou mo lenei galuega, e ala i le Aʻoga o le Faiva Faatiokarate ma le Sauniga o le Auaunaga. E faapefea ona tatou maua aogā mai i lenei toleniga?
2. E faapefea ona tatou maua aogā mai i le Aʻoga o le Faiva Faatiokarate?
2 Le Aʻoga o le Faiva Faatiokarate: Ia faitau ma suʻesuʻe faasologa o mataupu a o leʻi auai i sauniga taʻitasi. A o e mātaulia le faaaogāina e le tagata aʻoga o nei faamatalaga i a latou lauga, o le a faaauau ai ona e malamalama i le auala e faaleleia ai lau aʻoaʻo atu. (Faata. 27:17) Ia ave lau tusi Aʻoga o le Faiva i sauniga, ma faaaogā e fai ai au faamaumauga. A o talanoa atu le ovasia o le aʻoga i le tusi pe a māeʻa le lauga a tagata aʻoga taʻitasi, ia vase manatu autū e te manaʻo e faaaogā, ma faia au faamaumauga i avanoa i autafa. O le auala sili e maua ai aogā mai i lenei aʻoga, o le auai ma fai sau vaega. Po ua tusi lou igoa i le aʻoga? Pe a e maua se pepa mo se lauga, ia sauniuni lelei ma faaaogā fautuaga ua tuuina mai. Pe a e auai i le faiva, ia faaaogā mea ua e aʻoaʻoina.
3. O le ā e fesoasoani iā i tatou e maua ai aogā mai i le Sauniga o le Auaunaga?
3 Le Sauniga o le Auaunaga: E mafai ona tatou manatua fautuaga na aʻoaʻoina i le taimi o le sauniga, e ala i le muaʻi faitau o le mataupu atoa ma sauniuni sau tali. Pe afai e faapupuu a tatou tali, o le a maua le avanoa mo le toʻatele e fai ai so latou sao. Ia uaʻi totoʻa atu i faataʻitaʻiga, ma faaaogā so o se fautuaga e te manatu e sili ona aogā i lau faiva. Ia teu se kopi o mataupu autū mai i La Tatou Faiva o le Malo mo ni faamatalaga i le lumanaʻi.
4. Aiseā e tatau ai ona tatou faaaogā lelei toleniga faatiokarate?
4 E pei o tofiga na tuuina atu iā Noa ma Mose, o le poloaʻiga ia talaʻi le tala lelei i tuluʻiga uma o le lalolagi, o se luʻi mo i tatou. (Mata. 24:14) O le a tatou taulau pe a faamoemoe iā Ieova o lo tatou Aʻoaʻo Sili, ma faaaogā tatau le toleniga ua ia saunia.—Isa. 30:20.