O Uiga e Sili Ona Tāua o se Faiaʻoga Lelei
1. O le ā le uiga e pito i sili ona tāua o se faiaʻoga lelei?
1 O le ā se uiga e sili ona tāua o se tagata e avea ai o ia ma faiaʻoga lelei o le Tusi Paia? Aʻoaʻoga maualuluga? Lava le agavaa? Po o tomai masani? O le mea moni, o le alofa. O le uiga lenā ua faataunuu ai le Tulafono e iloa ai soo moni o Iesu, ma o le uiga foʻi lenā e sili ona mataʻina o Ieova. (Ioa. 13:35; Kala. 5:14; 1 Ioa. 4:8) O faiaʻoga lelei, e latou te faaalia le alofa.
2. Aiseā e tāua ai ona tatou alolofa i tagata?
2 Alofa i Tagata: O le Faiaʻoga Sili o Iesu, sa faaalia lona alofa moni i tagata, ma na uunaʻia ai i latou e faalogologo atu iā te ia. (Luka 5:12, 13; Ioa. 13:1; 15:13) Afai e tatou te manatu mamafa i tagata, o le a tatou molimau atu la iā i latou i so o se avanoa. E lē mafai e toʻatugā e pei o sauāga ma le faailoga lanu, ona taofia i tatou. O le a tatou faaalia le naunau moni iā i latou o loo tatou talaʻi atu i ai, ma o le a fetuutuunaʻi ai a tatou taulimaga ina ia talafeagai ma mea o loo latou manatu mamafa iai. O le a tatou lotomalilie e faaalu se taimi, e lē na o le taimi o le suʻesuʻega ma le tagata aʻoga o le Tusi Paia, ae faapea foʻi le taimi e te sauniuni ai mo suʻesuʻega taʻitasi.
3. E faapefea i le naunau i upu moni o le Tusi Paia ona fesoasoani iā i tatou i le faiva?
3 Ia Naunau i Upu Moni o le Tusi Paia: Sa naunau Iesu i upu moni o le Tusi Paia, ma sa tagaʻi i ai o ni oloa tāua. (Mata. 13:52) Afai e tatou te naunau i le upu moni, o le a tatou tautatala la ma le mautinoa, ma e faagaeeina ai le fiafia o la tatou ʻaufaalogologo. O lenei naunau, o le a fesoasoani iā i tatou e mafaufau loloto ai i le tāua o faamatalaga o loo tatou avatua, nai lo o le popople e faapea e lē lava le agavaa, ma faaitiitia ai le lē toʻa i la tatou faiva.
4. E faapefea ona tatou atiaʻe le alofa?
4 Atiaʻe le Alofa: E faapefea ona tatou atiaʻe le alofa mo tagata? E ala i le faataʻitaʻi i le alofa na faaalia e Ieova ma lona Alo, ma le naunau i le tulaga pagatia faaleagaga o tagata i la tatou oganuu. (Mare. 6:34; 1 Ioa. 4:10, 11) O le a faalolotoina lo tatou naunau i upu moni o le Tusi Paia, e ala i suʻesuʻega totino ma le manatunatu loloto. O le alofa o se vala o le fua o le agaga. (Kala. 5:22) O lea, e mafai ona tatou talosaga atu iā Ieova mo lona agaga paia ma lana fesoasoani, ina ia faatuputeleina ai lo tatou alofa. (Luka 11:13; 1 Ioa. 5:14) E tusa lava pe e tele lo tatou aʻoaʻoina, lava le iloa o le upu moni po o tomai masani, e mafai lava ona avea i tatou ma faiaʻoga uigā o le Tusi Paia, e ala i le faaalia o le alofa.