Mātua—Ia Tāmau Masaniga Lelei i a Outou Fanau
1. Aiseā e manaʻomia ai ona maumauaʻi mātua e tausia aʻe fanau i aʻoaʻiga ma apoapoaʻiga a Ieova?
1 O masaniga lelei e lē o se mea na tatou fananau mai ma i tatou, ma e lē mafai foʻi ona maua faafuaseʻi. E lē gata i lea, o le tāmauina o masaniga lelei i le fanau, e faaalu ai se taimi. O le “tāmau” o lona uiga “o le faaofi mālie” po o le “faatulutulu lemū atu e ala i lea matāua ma lea matāua.” E manaʻomia le maumauaʻi o mātua ina ia mafai ai ona latou ʻtausia pea a latou fanau i aʻoaʻiga ma apoapoaʻiga a Ieova.’—Efe. 6:4.
2. O le ā le tāua o le vave amata ona aʻoaʻoina le fanau i masaniga lelei?
2 Ia Amata Mai a o Tamameamea: E mataʻina le tomai o loo i tamaiti lāiti i le aʻoaʻoina ma le faia o ni mea fou. E ui lava e masani ona faigatā i tagata matutua ona aʻoaʻoina se gagana fou, ae e mafai e tamaiti lāiti e leʻi ō i le aʻoga ona aʻoaʻo ni gagana se lua po o se tolu i le taimi lava e tasi. Aua lava neʻi iai se lagona faapea e laʻitiiti tele lau tama mo le atiina aʻe o masaniga lelei. Afai e vave amata ona aʻoaʻoina i upu moni o le Tusi Paia ma faaauau pea, e oo ane i le taimi ua matua le tamaitiiti, ua faatumuina lona mafaufau i le poto lea o le a “faapotoina ai [o ia] mo le faaolataga.”—2 Timo. 3:15.
3. (a) O le ā se tasi o masaniga lelei e tatau ona tāmau i loto o le fanau a o lāiti? (e) E faapefea ona fesoasoani mātua i fanau e faia faapea?
3 Ia Fai ma Masani le Auai i le Auaunaga i le Fanua: O se masaniga lelei e tatau ona tāmau i se tamaitiiti i ona uluaʻi tausaga, o le talaʻi lea e lē aunoa o le tala lelei o le Malo o le Atua. E toʻatele mātua e latou te amataina lenei mea i le ave lea o a latou fanau i le faiva mai lea fale i lea fale a o tamameamea lava tamaiti. O le auai e lē aunoa o mātua i le galuega o le molimau atu, ua fesoasoani lea i a latou fanau e faatupuina ai se talisapaia ma le maelega mo le faiva. E mafai e mātua ona faailoa atu i fanau le auala e faia ai se sao i le avatuina o se molimau i vala taʻitasi o le auaunaga i le fanua.
4. O ā ni iʻuga lelei e maua e le fanau pe a tusia o latou igoa i le Aʻoga o le Faiva Faatiokarate?
4 O le tusiaina o le igoa i le Aʻoga o le Faiva Faatiokarate, ua mafai foʻi ona fesoasoani i le fanau. E aʻoaʻoina ai i latou i masaniga lelei o le faia o suʻesuʻega ma le auala e faitau ai ma le malamalama. Ua latou aʻoaʻoina ai le auala e talanoa ai e uiga i le Tusi Paia, faia o toe asiga, ma faia suʻesuʻega faale-Tusi Paia. O toleniga faapena e mafai ona faagaeeina ai i latou e avea o ni paeonia ma aapa atu mo faaeaga faapitoa o le auaunaga. E manatua ma le fiafia e le toʻatele o le ʻau Peteli ma misionare o latou uluaʻi aso i le aʻoga, ma manatu i ai o se sauniuniga na fesoasoani e latou te atiina aʻe ai masaniga lelei.
5. (a) Aiseā e sili atu ai ona lelei le toleni o fanau a o lāiti lava? (e) E faapefea ona iloa se matua e magafagafa?
5 Ua pei i tatou uma lava o omea i aao o le Fai Ipu Omea Sili o Ieova. (Isa. 64:8) O le fou o le omea, o le faigofie foʻi lenā ona faafoliga. O le umi ona tuu e faamago, o le faateleina foʻi lenā ona malō. O lea e faapena foʻi i tagata. A o lāiti i latou e sili atu lenā ona faigofie ona toleniina—ma e sili atu ona lelei a o lāiti lava. O o latou uluaʻi tausaga o taimi na e faigofie ai ona toleniina, e faatulaga ai a lē mo le lelei o le leaga. I le avea o se matua magafagafa, ia vave amata ona tāmau i lau fanau masaniga lelei i le faiva faa-Kerisiano.