“Ia Faia Pea Lenei Mea” Faamanatu le Faamanatuga iā Aperila 5
1. Aiseā e tāua ai ona faamanatu le Faamanatuga?
1 “Ia faia pea lenei mea e fai ma faamanatuga iā te aʻu.” (Luka 22:19) E ala i na upu, na faatonu ai e Iesu ona soo ina ia faamanatu lona maliu faataulagaina. Pe a manatu i mea uma ua faataunuuina i le taulaga togiola, e leai la se aso e sili atu ona tāua ma tautele i Kerisiano, nai lo o le faamanatuina o le Faamanatuga i tausaga taʻitasi. A o latalata mai le faamanatuga o lenei tausaga iā Aperila 5, e faaalia faapefea lo tatou lotofaafetai iā Ieova?—Kolo. 3:15.
2. E faapefea i le suʻesuʻe ma le manatunatu loloto ona faaalia ai lo tatou lotofaafetai mo le Faamanatuga?
2 Nofosauni: E masani lava e tatou te nofosauni mo mea e tatou te manatu i ai e tāua. E mafai ona sauniunia o tatou loto mo le Faamanatuga, e ala i le talanoaina faatasi o se aiga ma manatunatu loloto i mea na tutupu iā Iesu, a o faagasolo ona aso mulimuli i le lalolagi. (Esera 7:10) O loo maua i le kalena ma le tusi Iloiloina o le Tusi Paia i Aso Taʻitasi se lisi o mau, ae o loo iai i le itulau e 23-24 o Le Olomatamata o Fepuari 1, 2011, se lisi atoa o mau faatasi ai ma mataupu o le tusi Le Tagata Silisili.
3. E faapefea i le faateleina o so tatou sao i le faiva ona faailoa atu ai lo tatou lotofaafetai mo le Faamanatuga?
3 Talaʻi: E mafai foʻi ona faailoa atu lo tatou lotofaafetai e ala i le faia o se sao atoatoa i le faiva. (Luka 6:45) O le a faia se tauiviga i le lalolagi aoao e valaaulia ai isi i le Faamanatuga, e amata atu i le Aso Toonaʻi, Mati 17. Pe e mafai ona fetuunaʻi lau faasologa ina ia faateleina lou taimi i le faiva, atonu e ala i le avea o se paeonia lagolago? Aiseā e lē talanoaina ai o se aiga na mataupu i le isi taimi o le Tapuaʻiga a le Aiga i le afiafi o sosoo mai?
4. O ā ni aogā e mafai ona tatou maua mai le faamanatuina o le Faamanatuga?
4 Maʻeu lo tatou mauaina o aogā pe a auai i le Faamanatuga i tausaga taʻitasi! E faatuputeleina lo tatou olioli ma le alofa mo le Atua a o tatou manatunatu i le aao mafola o Ieova, i le saunia o lona Alo e toʻatasi e fai ma taulaga togiola. (Ioa. 3:16; 1 Ioa. 4:9, 10) O lenei mea e faamalosia ai i tatou ia lē toe ola mo i tatou lava. (2 Kori. 5:14, 15) E faagaeeina ai foʻi lo tatou naunau e viiviia Ieova i le lautele. (Sala. 102:19-21) Ioe, ua tulimataʻia ma le naunau e auauna lotofaafetai a Ieova lenei avanoa, o le a tatou maua i le Faamanatuga iā Aperila 5, ina ia ʻfaalauiloa ai le maliu o le Alii.’—1 Kori. 11:26.