Seʻi Faaalia le Lotofaafetai

Faamanatu le Faamanatuga iā Aperila 17

1. O ā faalogona o le faisalamo ua sili ona talafeagai i le vaitaimi o le Faamanatuga?

¹ Ona o le lotofaafetai i le tele o gaoioiga o le alofa mutimutivale ma le laveaʻiina e Ieova, na fesili ai le faisalamo: “O le ā se mea ou te totogi atu iā Ieova ona o mea lelei uma ua ia faia iā te aʻu?” (Sala. 116:12) E tele atu māfuaaga e lotofaafetai ai auauna a le Atua i aso nei. I le faitau senituri talu ona tusia nei upu faagaeeina, na foaʻi mai ai e Ieova lana meaalofa aupito sili, o le togiola. E tele māfuaaga e faaalia ai lo tatou lotofaafetai, a o sauni atu e faamanatu le maliu o Keriso iā Aperila 17.—Kolo. 3:15.

2. O ā nisi o māfuaaga e tatou te lotofaafetai ai mo le togiola?

² Faamanuiaga Ona o le Togiola: Ona o le togiola, ua mafai ai ona ʻfaamagaloina a tatou agasala.’ (Kolo. 1:13, 14) O lea ua mafai ai ona tatou tapuaʻi atu iā Ieova ma se lotofuatiaifo mamā. (Epe. 9:13, 14) Ua mafai ona tatou saʻoloto e talanoa atu iā Ieova e ala i le tatalo. (Epe. 4:14-16) O ē e faatuatua i le togiola, e latou te maua le faamoemoe matagofie o le ola e faavavau!—Ioa. 3:16.

3. E faapefea ona faaalia lo tatou lotofaafetai iā Ieova mo le togiola?

³ Auala e Faaalia ai le Lotofaafetai: O se tasi o auala e faaalia ai lo tatou matuā lotofaafetai, o le faitauina lea i aso taʻitasi o le faitauga Tusi Paia o le Faamanatuga, ma manatunatu loloto i ai. Na fuafuaina le mataupu i le Olomatamata o Fepuari 1, 2011, “Po ua E Nofosauni mo le Aso e Sili Ona Tāua o le Tausaga?” ina ia fesoasoani iā i tatou e faia ai faapea. E mafai foʻi ona tatou faailoa atu iā Ieova i le tatalo mai le loto, le matuā tāua iā i tatou o le togiola. (1 Tesa. 5:17, 18) O lo tatou auai i le Faamanatuga ona o le usiusitaʻi i le poloaʻiga a Iesu, ua faaalia ai lo tatou lotofaafetai. (1 Kori. 11:24, 25) E lē gata i lea, e mafai ona tatou faataʻitaʻi i le alofa tele o Ieova e ala i le valaaulia o le toʻatele o tagata e mafai ai, ina ia aufaatasi ma i tatou.—Isa. 55:1-3.

4. O le ā lo tatou faanaunauga e tatau ona iai?

⁴ O auauna a Ieova e lotofaafetai, e lē manatu māmā i le faamanatuina o le Faamanatuga. O le sauniga lea e sili ona tāua i le tausaga! A o lata mai le Faamanatuga, tau ina ia pei lo tatou faanaunauga o le faisalamo, o lē na tusi: “Loʻu loto e, inā vivii atu ia iā Ieova, aua foʻi neʻi galo mea uma ua ia faia.”—Sala. 103:2.