Molimau a Ieova—Gaoioiga o le Faatuatua, Vaega 1: Mai le Pōuliuli
I le Tusi Paia, e fesootaʻi le malamalama ma le upu moni, ae e fesootaʻi le pōuliuli ma tala pepelo. (Sala. 43:3; Isa. 5:20) Na amata e Satani le pōuliuli i le lalolagi ina ua ia faasesēina Eva, ma mulimuli ane ia faapouliuligia le lalolagi atoa. (Faaa. 12:9) O loo faamatala mai i le vitiō Jehovah’s Witnesses—Faith in Action, Part 1: Out of Darkness, le auala na amata ai ona faaeseese le malamalama faaleagaga mai le pogisa. (Isa. 60:1, 2) Pe a māeʻa ona matamata le vitiō, pe mafai ona e taliina fesili nei?
(1) Na faapefea ona mapuna aʻe le pogisa ina ua mavae atu le ʻauaposetolo? (2) I le amataga o vaitausaga mai le 1100, o le ā na fesoasoani i tagata e iloa ai e lē o aʻoaʻoina e lotu le upu moni? (3) O ai Henry Grew ma George Storrs? (4) O ā mea na tutupu i le olaga o Charles Russell sa iai se aafiaga tāua iā te ia? (5) Na faapefea ona fai suʻesuʻega faale-Tusi Paia a Russell, lona tamā ma nisi o ana aumea, ma o ā faaiʻuga e faavae i le Tusi Paia na latou faia? (6) Na faapefea ona tuufaatasi lenei vaega e suʻesuʻeina le Tusi Paia ma le vaega a Nelson Barbour, ae o le ā na māfua ai ona vavae ese le uso o Russell? (7) O le ā na tupu iā Iulai i le 1879 na amata ai se suiga fou o le malamalama faaleagaga? (8) Mulimuli ane, o le ā na faia e le vaega ua faatoʻateleina o Tagata Aʻoga o le Tusi Paia ina ia folafola atu ai le tala lelei? (9) A o leʻi oo i le 1914, o le ā na faatalitalia e Tagata Aʻoga o le Tusi Paia o le a tupu i lenā tausaga? (10) O ā luʻi na fesagaʻi ma Tagata Aʻoga o le Tusi Paia ina ua maliu le uso o Russell? (11) O le ā na faia e Tagata Aʻoga o le Tusi Paia ina ua tatala mai le uso o Rutherford ma ana aumea mai le falepuipui? (12) A o e matamata i lenei vitiō, ua faapefea ona faamalosia ai lou talisapaia o le faalapotopotoga a Ieova? (13) Ua faapefea i lenei vitiō ona faamalosia ai lou naunautaʻiga ia faaauau ona talaʻi ma le maelega e ui i faigatā? (14) E faapefea ona tatou faaaogā lenei vitiō e fesoasoani ai i o tatou tauaiga, tagata aʻoga o le Tusi Paia ma isi?
Maʻeu se tofiga tāua faaleagaga na faia e na uluaʻi Tagata Aʻoga o le Tusi Paia mo i tatou! E ui ua tumu lenei lalolagi i le pogisa faaleagaga, ae sa avea i latou o ni tagata lototetele ma maelega e faasusulu atu le malamalama. Tau ina ia tatou faaaʻoaʻo i la latou faaaʻoaʻoga ma “savavali e faapei o fanau o le malamalama.”—Efe. 5:8.