Tupe Siliva e Lua e Itiiti le Aogā

O se tasi o auala tāua e tatou te lagolagoina ai manaʻoga o le Malo, e ala i meaalofa foaʻi tautupe i le galuega talaʻi i le lalolagi aoao. Ae faapefea pe afai e lē tele ni a tatou tupe?

I se tasi taimi, na iloa atu ai e Iesu se fafine mativa ua oti lana tane o loo tuuina ni tupe iti se lua i totonu o le pusa tuu tupe o le malumalu. O le alofa o le fafine iā Ieova na uunaʻia ai e “foaʻi tupe uma ua iā te ia e ola ai.” (Mare. 12:41-44) O le taʻua e Iesu o lenei mea, e faailoa mai ai na tāua tele i le silafaga a le Atua le meaalofa a le fafine. I se tulaga tutusa, e leʻi manatu Kerisiano o le uluaʻi senituri i le tiute tauave o le lagolagoina o le faiva e ala i meaalofa tautupe, o se faaeaga e mo na o Kerisiano mauoloa. Na taʻua e le aposetolo o Paulo le faaaʻoaʻoga a uso Maketonia o ē e ui ina “matuā matitiva . . . na matuā ʻaiʻoi mai . . . mo se faaeaga e foaʻi atu ai ma le agalelei.”—2 Kori. 8:1-4.

O lea, pe a mafai ona tatou foaʻi atu ʻni tupe iti se lua,’ e tatau ona tatou manatua o le tuufaatasia o ni meaalofa itiiti se tele, e maua ai se meaalofa telē. O lo tatou foaʻi atu mai le loto, o le a faafiafiaina ai lo tatou Tamā limafoaʻi i le lagi, auā “e alofa le Atua i lē e foaʻi ma le lotofiafia.”—2 Kori. 9:7.