O le ā se Mea e te “Mitamita Ai”?
1. O le ā se mea e te mitamita ai i faaiʻuga o masina taʻitasi?
1 Pe a tāpā lau lipoti i faaiʻuga o masina taʻitasi, o le ā se mea e te “mitamita ai”? (Kala. 6:4) Po o i tatou o ni paeonia faapito e 130 itula, po o ni tagata talaʻi e lipotia na o le 15 minute, ae e ao iā i tatou uma ona olioli i mea ua mafai ona tatou faia ma le lotoatoa iā Ieova.—Sala. 100:2.
2. Aiseā e tatau ai ona faia le mea sili i le auaunaga iā Ieova?
2 Ona o Ieova o le Alii Pule Silisili Ese, e tatau la ona tuu atu iā te ia le mea e sili e tatou te mafaia. (Mala. 1:6) Ua tuuina atu o tatou ola ia faia lona finagalo ona e tatou te alolofa iā te ia. Pe afai na tatou ofo atu le mea sili, o o tatou taimi, taleni ma le malosi i le auaunaga iā Ieova i le faaiʻuga o le aso po o le masina, ua iai la se mea e ao ona tatou mitamita ai. (Faata. 3:9) Peitaʻi, afai e taʻu mai e o tatou lotofuatiaifo e sili atu nisi mea e mafai ona tatou faia, e tatau la ona iloilo mea e ao ona toe faaleleia.—Roma 2:15.
3. Aiseā e lē atamai ai le faatusatusa atu o i tatou i isi?
3 “Aua le Faatusatusa”: E lē atamai le faatusatusa o i tatou i isi, pe afai ua sili atu lo tatou malosi ma mea e mafai ona tatou faia. E iai taimi e suia ai le tulaga o mea. E eseese mea e mafai ona tatou faia. O le faatusatusa, e iʻu ai i le faatautavā po o faalogona o le lē aogā. (Kala. 5:26; 6:4) E leʻi faatusatusa e Iesu le tasi i le isi. Nai lo o lea, sa ia faamālō atu e tusa ai o le mea ua mafai ona faia e le tagata.—Mare. 14:6-9.
4. O ā lesona e tatou te aʻoaʻoina mai i le talafaatusa e uiga i taleni?
4 I le talafaatusa a Iesu e uiga i taleni, na tuu atu i tagata faigaluega taʻitasi taleni e “faatatau i le mea e mafaia e le tagata.” (Mata. 25:15) Ina ua foʻi mai le matai ma talosaga atu mo se lipoti o la latou galuega, sa faamālō atu i ē na galulue maelega e tusa ai ma lo latou tulaga ma le malosi, ma na olioli faatasi ma lo latou matai. (Mata. 25:21, 23) I se tulaga talitutusa, a o tatou pisi i le galuega talaʻi o le Malo, e mautinoa o loo finagalo malie mai Ieova ma e iai se mea e tatou te mitamita ai!