Fesoasoani i Tagata ia Faalogo i le Atua
1. O ā polosiua na tatala i le Tauaofiaga Itumalo, ma aiseā ua avea ai o ni meafaigaluega aogā?
1 I le Tauaofiaga Itumalo ʻIa oo Mai le Malo o le Atua!’ sa tatalaina ai polosiua fou e lua, E te Ola e Faavavau pe a E Faalogo i le Atua, ma le polosiua Ia Faalogo i le Atua. E lē tele ni faamatalaga, ma e faigofie ma vave ona faaliliuina. I le taimi na tatala ai nei polosiua, ua uma ona faamaonia o le a faaliliuina i gagana e 431.
2. O ai o le a aogā i ai nei polosiua?
2 O ai e aogā i ai nei polosiua? Iloilo tulaga o loo taʻua i lalo e masani ona tulaʻi mai:
• O loo talanoa se tagata talaʻi ma lē e ona le fale, a lē o le uluaʻi asiasiga o se toe asiga, ma iloa ai e lē iloa e le tagata tusitusi ma e lē lelei foʻi le faitau.
• O loo talanoa se tagata talaʻi i ni tagata e tautatala i se gagana, e lē tele pe e leai foʻi ni a tatou lomiga ua faaliliuina i ai. Po o le toʻatele foʻi e nonofo i le oganuu, ae e lē iloa faitau i la latou lava gagana.
• O se tagata talaʻi o loo talanoa i sē e logonoa i lana oganuu.
• O se matua o loo aʻoaʻo le upu moni i sona alo laʻitiiti e lē iloa faitau.
3. Na faapefea ona faatulaga le polosiua Ia Faalogo i le Atua?
3 Le Auala na Faatulaga Ai: E lē tele ni faaupuga i le polosiua Ia Faalogo i le Atua, e na o se fuaiupu faigofie ma se mau sii i le pito i lalo o itulau taʻitasi e faamatilatila ai manatu autū. Aiseā? Seʻi faapea e ofo atu e se tagata iā te oe se polosiua e lomia i se gagana e lē mafai ona e faitauina, ma o loo iai ata o ni tagata e te lē iloaina. Pe e te fiafia i ai e tusa lava pe e iai ni ata mananaia? Atonu e leai. E faapena foʻi la se tagata e lē iloa faitau tusi, e lē fiafia i se lomiga e tele ni faamatalaga. O lea la, ua saunia lelei ai ata i itulau taʻitasi, faatasi ma faaaū e tataʻi ai le talanoaga mai i le tasi ata i le isi ata.
4. Na faapefea ona faatulaga le polosiua E te Ola e Faavavau pe a E Faalogo i le Atua?
4 E tutusa ata o le polosiua E te Ola e Faavavau pe a E Faalogo i le Atua, ma le polosiua Ia Faalogo i le Atua. Ua fuafuaina ina ia suʻesuʻe ai ma i latou e lē lelei po o loo tau aʻoaʻo foʻi le faitau. E mafai foʻi ona faaaogā e le faiaʻoga le polosiua E te Ola e Faavavau pe a E Faalogo i le Atua, e fai ma ana kopi pe afai o loo suʻesuʻe ma se tasi i le polosiua Ia Faalogo i le Atua. O le a taliina i lesona taʻitasi ulutala o loo i le pito i luga i le itu agavale. O loo iai foʻi i ata ni faamatalaga ma mau o loo sii mai. I nisi o itulau e iai se pusa i le tulimanu o loo iai ni manatu ma mau faaopoopo e mafai ona talanoaina, e fua i le tomai o le tagata aʻoga.
5. O le ā le taimi ma e faapefea ona ofo nei polosiua?
5 Le Auala e Faaaogā Ai: E tusa lava pe e lē o le ofo lea o le masina, ae e mafai ona e ofo se tasi o nei polosiua i le talaʻiga pe afai e manaʻomia. (Tagaʻi i le pusa “Le Auala e Ofo Ai.”) E mafai ona e faailoa atu i lau toe asiga o loo iai se mea e te manaʻo e faaali atu iā te ia, ma tuu atu loa i ai le polosiua.
6. O le ā le auala e faia ai se suʻesuʻega faale-Tusi Paia e faaaogā ai nei polosiua?
6 E leai ni fesili o le polosiua Ia Faalogo i le Atua, o lea la, e lē faia le talanoaga e faafesili ma tali e pei o le auala e suʻesuʻe ai le tusi Aʻoaʻoga a le Tusi Paia. O so o se atunuu lava e fiafia tagata e faalogologo i tala. O lea la, ia faaaogā ata e faamatala ai tala o loo tusia i le Tusi Paia, ma ia faamatala manino. Ia fesili atu i le tagata aʻoga e faailoa mai sona manatu. Faitau mau o loo i le pito i lalo o le itulau, ma talanoa faatasi i ai. Ia fai ni fesili e faaaofia ai le tagata aʻoga i le talanoaga ina ia iloa ai po o malamalama. Pe afai o loo ia faaaogāina le polosiua E te Ola e Faavavau pe a E Faalogo i le Atua, ia faitau faatasi la faamatalaga ma mau o loo tusia ai, pe a talanoaina ata taʻitasi.
7. E faapefea ona tatou fesoasoani i tagata aʻoga o le Tusi Paia ia agaʻigaʻi i luma?
7 Fesoasoani i le Tagata Aʻoga ia Agaʻigaʻi i Luma: E ao ona faaosofia le naunau o lau tagata aʻoga e aʻoaʻo lana faitau, ina ia mafai ai e ia lava ona aʻoaʻoina le poto saʻo. (Mata. 5:3; Ioa. 17:3) O lea la, pe afai o loo faia le talanoaga i le polosiua Ia Faalogo i le Atua, ma ua e manatu ua sauni le tagata aʻoga, atonu e mafai ona e ofo atu e aʻo lana faitau, ma e mafai ona sui le suʻesuʻega i le polosiua E te Ola e Faavavau pe a E Faalogo i le Atua. Po o le ā lava le polosiua e te faaaogāina, e lē faapea ai ua sauni le tagata aʻoga e papatiso pe a uma le polosiua. E tatau ona faaauau le suʻesuʻega i le tusi Aʻoaʻoga a le Tusi Paia, po o se isi lomiga talafeagai o le a fesoasoani iā te ia e malamalama atoatoa ai i le Tusi Paia.
8. Aiseā e te lotofaafetai ai mo nei meafaigaluega fou?
8 Ina ia maua e tagata le ola e faavavau, e tatau ona latou faalogo i le Pule Silisili Ese. (Isa. 55:3) E finagalo Ieova i ʻtagata uma’ lava e aofia ai ma ē e lē iloa faitau tusi, ia latou aʻoaʻoina le auala e faalogo atu ai iā te ia. (1 Timo. 2:3, 4) E tatou te matuā lotofaafetai mo nei meafaigaluega fou, e aʻoaʻoina ai tagata i le auala e faalogo ai i le Atua!
[Pusa i le itulau 3]
Le Auala e Ofo Ai
Faasino atu i le tagata o le aiga le itulau e 2-3 ma faapea atu: “Pe e te fia ola i se lalolagi faapenei? [Faatali mo se tali.] Ua folafola mai i le Tusi Paia ua lē o toe umi ona suia lea e le Atua le lalolagi e avea ma nofoaga matagofie, filemu ma e leai se tasi e mativa pe maʻi. Seʻi mātau le mea e tatau ona tatou faia ina ia ola ai i lenā lalolagi. [Faitau le Isaia 55:3 lea o loo sii mai i le pito i luga i le itulau e 3.] O loo taʻua i lenei mau ia tatou ʻō atu’ i le Atua ma ʻfaalogo atu’ iā te ia. Ae e faapefea ona tatou faalogo i le Atua?” Suʻe i le itulau e 4-5 ma talanoa faatasi le tali. Pe afai e lē avanoa, tuu i ai le polosiua ma fai ni fuafuaga e toe foʻi atu ma talanoa i le tali.