Ia Leoleoina Lou Mafaufau

1. O le ā le matua o le fonotaga matagaluega mo le tausaga faaleauaunaga 2013, ma o le ā le fuafuaga o le polokalame?

¹ Na faatonu e Iesu ona soo ia alolofa atu iā Ieova ma o latou lotoatoa, ola atoa ma mafaufau atoa. (Mata. 22:37, 38) Ua faatulagaina le tauaofiaga, fonotaga itumalo ma le aso faapitoa mo fonotaga o lenei tausaga, ina ia fesoasoani iā i tatou e faamalosia ai lo tatou tagata i totonu. Mo lo outou silafia, o le matua o la tatou tauaofiaga itumalo, “Ia Leoleoina Lou Loto!” O le matua o le polokalame o le aso faapitoa mo fonotaga mo le tausaga faaleauaunaga 2013, “Ia Leoleoina Lou Lotofuatiaifo.” Ae o le faasologa o fonotaga matagaluega lea o le a amata i le masina fou, ua faamatuaina “Ia Leoleoina Lou Mafaufau,” e faavae mai i le Mataio 22:37. Ua saunia lenei polokalame ina ia fesoasoani iā i tatou taʻitoʻatasi e iloilo ai o tatou manatunatuga, ina ia matuā faafiafiaina ai le finagalo o Ieova.

2. O ā fesili e tatau ona tatou saʻilia tali a o faagasolo le polokalame?

² Mea o le a Talanoaina Ai: A o tatou faalogologo i le polokalame o le fonotaga matagaluega, ia saʻili tali o fesili nei, ia o le a talanoaina ai manatu autū:

• E mafai faapefea ona tatou ʻalofia ʻmanatu faaletagata’?

• E faapefea ona tatou fesoasoani e aveese le ufiufi o loo faatauasoina ai manatu o ē e lē talitonu?

• O le ā le ituaiga mafaufau e tatou te mananaʻo i ai?

• O ā aogā e maua mai i le manatunatu lelei?

• E mafai faapefea ona faataga Ieova e taaʻina o tatou mafaufauga?

• E faapefea ona saosaolaumea tane, avā, mātua ma fanau i le mauaina o le fiafia i le aiga?

• E faapefea ona tatou nofosauni mo le aso o Ieova?

• O le ā le uiga o le faaupuga ia sauniunia o tatou mafaufau mo galuega fitā?

• O ā aogā e maua e i latou e faatatauina mea ua latou aʻoaʻoina?

3. Aiseā e tāua ai ona tatou auai i aso uma e lua, uaʻi totoʻa atu ma faatatau mea e tatou te aʻoaʻoina?

³ O loo taumafai malosi Satani e faasesē ma faaleagaina o tatou mafaufau. (2 Kori. 11:3) O lea la, e tatau ona leoleoina o tatou mafaufau ma pulea o tatou manatunatuga. E ao ona faaauau ona tatou mafaufau e pei o Keriso, ma tauivi e tetee atu i taaʻiga a lenei lalolagi amioleaga. (1 Kori. 2:16) O lea la, ia fai ni fuafuaga ina ia auai i aso uma e lua o le fonotaga matagaluega. Ia uaʻi totoʻa atu. Pe afai e faatatauina faamatalaga aogā o le a talanoaina ai, o le a fesoasoani iā i tatou e sauniunia ai o tatou mafaufau mo le auaunaga maelega o le Malo.—1 Pete. 1:13.