Pe Mafai Ona E Auai i Talaʻiga i le Afiafi?
1. E tusa ai o le faamatalaga a se tusi, o le ā le taimi sa talaʻi ai Paulo mai lea fale i lea fale?
1 Ua taʻua i le tusi Daily Life in Bible Times, sa fai ma masani a le aposetolo o Paulo le auai i le talaʻiga i lea fale i lea fale, “mai i le 4 i le afiafi seʻia oo i le leva o le pō.” E tatou te lē iloa po o le faasologa masani lea a Paulo, ae e mautinoa sa lotomalie o ia e “faia mea uma ona o le tala lelei.” (1 Kori. 9:19-23) E aofia ai i lenei tulaga le fetuunaʻi o ana meafai i aso taʻitasi, ina ia auai i le talaʻiga mai lea fale i lea fale pe a toʻatele tagata e talanoa i ai.
2. Aiseā e avea ai le afiafi o se taimi lelei e talaʻi ai?
2 I le tele o atunuu, ua fai ma masani a le ʻautalaʻi le galulue mai lea fale i lea fale i taeao a o faagasolo le vaiaso. Peitaʻi i lou vaipanoa, pe o talafeagai pea lea taimi? Na taʻua e se paeonia e tusa ai o lana oganuu: “E seāseā maua tagata i fale a o faagasolo le aso. Ae o le toʻatele lava e maua i fale i le afiafi.” O talaʻiga i le afiafi, atonu o se avanoa sili lea e maua ai tamāloloa e talanoa i ai i le tala lelei. E masani lava o taimi ia e sili ona naunau ma fiafia ai tagata o aiga e talanoa. Pe afai e aogā ona faia faapea, e tatau la i toeaina ona faatulaga ni faatasiga mo talaʻiga i afiafi.
3. E faapefea ona tatou faautauta pe a talaʻi i le afiafi?
3 Ia Faautauta: E tāua ona faautauta pe a auai i le talaʻiga i le afiafi. Mo se faataʻitaʻiga, pe afai e tau atu i se tagata ae e lē o talafeagai le taimi, e pei o le taimi o taumafataga i le afiafi, e sili pe a fuafua e toe asiasi atu i se isi taimi. Afai ua pogisa, ia tū i se tulaga e mafai ona iloa mai oe e lē e ona le fale, ma ia vave faailoa atu oe ma le autū o lau asiasiga. O se mea atamai foʻi le galulue taʻitoʻalua pe i ni vaega, ma ia galulue i auala e malamalama lelei molī, lea e lē na o outou o savavali ai. Aua neʻi tuai tele le taimi e talaʻi ai i le afiafi, ina neʻi faalavelave i aiga ua sauni e momoe. (2 Kori. 6:3) Pe afai e lē saogalemu se vaipanoa i le afiafi, ia vave amata le talaʻiga a o leʻi pogisa.—Faata. 22:3.
4. O ā faamanuiaga e maua mai i talaʻiga i le afiafi?
4 Faamanuiaga: E sili atu ona fiafia i le faiva pe a talanoa i tagata i taimi e maua ai le toʻatele i fale. O le tele e tatou te talaʻi ai, o le tele foʻi lenā o avanoa e fesoasoani ai i isi ina ia ʻfaaolaina ma ia maua le poto saʻo i le upu moni.’ (1 Timo. 2:3, 4) Pe mafai ona fetuunaʻi lau faasologa ina ia auai i talaʻiga i le afiafi?