Taulimaina o le Tala Lelei—I Itula o le Afiafi
1 Na taʻu atu e le faitaulaga sili a Iutaia i nisi o uluai soʻo o Iesu Keriso, “Ua outou faatumu i Ierusalema i la outou [aʻoaʻoga].” (Galu. 5:28) E manino lava sa faia e uso se galuega lelei o le molimau atu i lena aai, ma e lē taumatea sa latou galulue ma le tinoū ia faafesootaʻia tagata uma lava i la latou oganuu. Sa faaauau pea ona latou avatu se molimau maeʻaeʻa i inā atoa ma isi mea.—Galu. 8:25.
2 E ui ina o loo iai pea oganuu a le tatou lala e leʻi oo i ai ni talaʻiga, ae i le tele o atunuu i aso nei, ua faatumuina e uso le oganuu i aʻoaʻoga o le upu moni. O loo iai se faatelega aupito lelei o tagata talaʻi ma se faatelega talafeagai i le aofai o faapotopotoga. Ua faasolo ina laiti oganuu e molimau atu ai ma ua ufitia soo. Ua matuā manaomia ai ona faalauteleina le oganuu ina ia ausia ai le toatele o tagata ma le tala lelei.
AOGĀ O LE MOLIMAU ATU I LE AFIAFI
3 E toatele tagata talaʻi ua iloa e mafai ona latou, faalauteleina ma le uigā la latou oganuu e ala i le asiasi atu i aiga i itula o le afiafi. O le taimi lena e mafai ai ona latou fesootai ma le toatele o tagata o aiga o ē ua masani ona lē iai i le fale i taimi o le aso. Ua lipotia mai e tagata talaʻi le mauaina o se tasi toetoe lava i fale uma i la latou oganuu ina ua latou asiasi atu i le afiafi. E lē gata ina toatele tagata i aiga, ae o ē na maua atu ua masani ona iai i se tulaga faasamasamanoa ma e lotomalilie e faalogologo i la tatou feau. Ua mafai ona fesoasoani ovasia matagaluega i le tele o faapotopotoga e faamaopoopoina ni faatatauga mo le molimau atu i le afiafi. E ui ina e lē ufitia soo le oganuu i inei e pei o le tele o nofoaga i atunuu i fafo, ae ua faalaeiauina tagata talaʻi uma lava e lagoalgoina e lē aunoa lenei vaega o le afiafi o le Aso Lulu i le taimi o le asiasiga a le ovasia matagaluega.
4 Pe ua e taumafai ea e molimau atu i itula o le afiafi i lau oganuu? Ua ia i tatou le avanoa i le taimi lenei o le tausaga e faaumiumi ai pea ona ō i le talaʻiga na i lo le mea tatou te masani ai. E mafai ona faaaogā se vaega o le afiafi mo le molimau atu i lea fale ma lea fale po o le asiasi atu foi i fale sa leʻi maua ai nisi muamua. Ona mulimuli ane lea i le afiafi, e mafai ona tatou faia ni toe asiga pe faafoeina se suesuega faale-Tusi Paia. Tusa foi pe faasolo ina pupuu ao i le faaiʻuiʻuga o le tausaga, atonu e mafai ona tatou faaaogāina itula o le afiafi ae leʻi pogisa e molimau atu ai i lea fale ma lea fale. O le mea moni, e manaomia ona tatou faaaogāina le agaga o le mafaufau tatau ma faaalia le magafagafa, ae maise lava pe a molimau atu i nofoaga atonu e lē saogalemu pe a pogisa.
IA MANATUNATU I ISI
5 Ina ia taulau i le molimau atu i le afiafi, e manaomia ona teu i o tatou manatu nisi o manatu faavae. Mo se faaaʻoaʻoga, ona e ono faapopoleina tagata i nisi nofoaga e uiga i ē asiasi atu i le afiafi ae leʻi faatalitalia, tatou te mananao ai e mafana ma faaleuo i a tatou faatomuaga ma ia faanatinati ona faamanino atu le mafuaaga o la tatou asiasiga. Afai e mafai ona tatou faailoa atu le manatu mamafa moni mo le lelei o tagata o aiga, o le a atili ai la ona latou lagona le toʻa ma atonu o le a faapogaia atili ai i latou e faaleoina mai i latou lava i lumamea.
6 E tele faapotopotoga ua fuafua e molimau atu i vaega i se afiafi e tasi pe sili atu foi i le vaiaso. Ua avatu ai e lenei mea i tagata talaʻi o ē faigaluega faasoloatoa se avanoa e sili atu ina ia auai i le faiva ma galulue ai foi ma nisi o tagata talaʻi latou te leʻi galulue lava muamua ona o le felaasaʻi o faasologa o galuega. Ua avea le molimau atu i le afiafi ma auala ua mafai ai e nisi o tagata talaʻi ona faateleina le aofaiga o le taimi latou te faaaluina i le faiva i le fanua, ma o lona iʻuga, ua taʻitaʻia ai i lo latou matuā agavaa e fetufaai le tala lelei ma isi. Ua faapea ai foi, ona tele suesuega faale-Tusi Paia ua amataina o se taunuuga o le faafesootaia o tagata taitoatasi o ē sa leʻi faalogo muamua i Molimau a Ieova.
7 Faamata e mafai ona e auai i le molimau atu i le afiafi ma olioli ai i lenei avanoa faaopoopo e “fai le galuega a lē folafola le tala lelei”? (2 Timo. 4:5) Afai e toatele i tatou e mafai ona taliina lena fesili ma le mautinoa, atonu la e mafai foi e i tatou ona faia se galuega e sili ona lelei o le faatumuina o la tatou oganuu i le upu moni.