Aua le Manatu Faatauvaa iā te Oe—Taulimaina o se Faasologa Pisi
1. Aiseā e faatalatū ai nisi e ofo atu se suʻesuʻega faale-Tusi Paia?
1 O nisi e faatalatū e ofo atu se suʻesuʻega faale-Tusi Paia, ona e pisi a latou faasologa. O le aʻoaʻoina o se tagata aʻoga o le Tusi Paia e alu ai le taimi. E manaʻomia se taimi e sauniuni ai mo le suʻesuʻega, faia le suʻesuʻega, ma fesoasoani i le tagata aʻoga ina ia foʻia ona faafitauli. Na faapea mai le aposetolo o Paulo, na ia ofoina atu lona ola e fesoasoani iā i latou i Tesalonia, ina ia iloa Ieova. (1 Tesa. 2:7, 8) E faapefea ona tatou faia se suʻesuʻega faale-Tusi Paia e ui i le pisi o le faasologa?
2. E faapefea i le alofa iā Ieova ona aafia ai le faaaogāina o lo tatou taimi?
2 E Manaʻomia le Taimi i le Tapuaʻiga: O le mea moni, e manaʻomia le tele o le taimi i la tatou tapuaʻiga. O se faataʻitaʻiga, e tatou te faaalu e lē aunoa le taimi e auai ai i sauniga, talaʻiga, faitauina o le Tusi Paia, faapea ma le tatalo. O se tagata faaipoipo e pisi, e fiafia e faaalu se taimi faatasi ma lana paaga. Pe e lē tatau la ona tatou “faaaogā tatau le taimi” e tapuaʻi ai iā Ieova ona e tatou te alolofa iā te ia? (Efe. 5:15-17; 1 Ioa. 5:3) E tusa ai ma fetalaiga a Iesu, o se vala pito sili ona tāua o le tapuaʻiga, o le faia o isi ma soo. (Mata. 28:19, 20) O le manatunatu i lenei mea, o le a tatou lē faatalatū ai e talia le faaeaga o le faia o suʻesuʻega faale-Tusi Paia.
3. E faapefea ona faaauau pea se suʻesuʻega faale-Tusi Paia, e ui i tulaga e faalavelavea ai la tatou faasologa?
3 Ae faapefea pe a faalavelavea a tatou faasologa ona o galuega, o se gasegase faaumiumi, po o ni tofiga tāua faatiokarate? O nisi tagata talaʻi e masani ona faaaogā telefoni po o le initaneti e faia ai suʻesuʻega faale-Tusi Paia. O nisi ua aafia i gasegase faaumiumi, e fuafua e ō atu a latou tagata aʻoga i o latou fale e faia ai suʻesuʻega. A o isi ua faatulaga se tasi e alu e fai lana suʻesuʻega faale-Tusi Paia pe a lē avanoa.
4. O ā faamanuiaga e maua pe a auai i le faia o suʻesuʻega faale-Tusi Paia?
4 Sa maua e Paulo le olioli ona o le foaʻi atu o lona ola ma le malosi, e fesoasoani ai i isi e aʻoaʻoina le upu moni. (Galu. 20:35) Na uunaʻia Paulo e faafetai iā Ieova, pe a toe mafaufau iā i latou na fesoasoani i ai i Tesalonia. (1 Tesa. 1:2) E mafai ona faateleina le olioli ma le faamalieina i le faiva, pe afai e lē avea le pisi o le faasologa, ma mea e taofia ai i tatou mai le faia o suʻesuʻega faale-Tusi Paia.