“Ia Nonofo Filemu ma Tagata Uma”
1. O le ā le fautuaga faale-Tusi Paia e fesoasoani iā i tatou pe a lē fiafia mai lē e ona le fale?
1 E fiafia tagata o Ieova e tausia le filemu, ma o loo faaalia atu foʻi lenā uiga i la tatou talaʻiga. (Isa. 52:7) E iai taimi e tatou te feiloaʻi ai ma tagata e lē fiafia mai ona o le talaʻiga. O le ā e fesoasoani iā i tatou e tausia ai le filemu?—Roma 12:18.
2. Aiseā e tāua ai ona iā i tatou le faautautaga loloto?
2 Faautautaga Loloto: O nisi e lē fiafia ona e tetee i le upu moni, a o isi atonu o ni māfuaaga e lē fesootaʻi mai i la tatou talaʻiga. Atonu e lē o saʻo le taimi o loo asiasi atu ai, pe e lē o fiafia foʻi i sona faafitauli patino. E tusa lava po o le tala lelei ua māfua ai ona ita, ae ia manatua, ua māfua ona tali mai faapea ona ua faatauasoina o ia. (2 Kori. 4:4) O le iai o le faautautaga loloto, o le a tatou faaalia ai pea le filemu, ma lē amanaʻia ai le lē fiafia mai o le tagata.—Faata. 19:11.
3. E faapefea ona tatou faaalia le faaaloalo i lē e ona le fale?
3 Faaaloalo: O le toʻatele o tagata e maumaututū i o latou talitonuga. (2 Kori. 10:4) E iai la latou aiā e filifili ai pe e faalogo pe e leai. Aua neʻi manatu faatauvaa i o latou talitonuga, pe manatu e sili atu lo tatou iloa i le Tusi Paia nai lo o i latou. A talosaga mai loa e tuua lona fale, e tatau lava ona faaalia le faaaloalo loloto.
4. O le ā le uiga o le tautala atu ma le agalelei?
4 Tautala Atu ma le Agalelei: E tusa pe e fai mai e se tasi faamatalaga tigā iā i tatou, ae e ao pea ona faaalia atu le agamalu ma le agalelei. (Kolo. 4:6; 1 Pete. 2:23) Nai lo o le faia o se finauga, taumafai e saʻili se mea e te lua ioe faatasi i ai. Atonu e mafai ona e fesili atu i se auala agalelei i le māfuaaga o lona lē fiafia. Peitaʻi, o le tele o taimi, e atamai atu ona faamuta le talanoaga ina ia ʻalofia ai le faateteleina o le lē fiafia o le tagata.—Faata. 9:7; 17:14.
5. O ā aogā o le faatupuina o le filemu?
5 Pe a tatou faatupuina le filemu, atonu o le a mātauina e lē e ona le fale lo tatou agalelei, ma faalogo mai ai i se taimi pe a toe talaʻi atu se tasi iā te ia. (Roma 12:20, 21) E ui e tumau ona tetee mai, ae atonu e iai lava se aso o le a avea ai o ia ma uso. (Kala. 1:13, 14) E tusa pe e fiafia mai pe e leai, ae o le faaalia pea o le agamalu ma le filemu, o le a faamamaluina ai Ieova atoa ai ma a tatou aʻoaʻoga.—2 Kori. 6:3.