ʻIa Molimau Māeʻaeʻa’
1. O le ā le faaaʻoaʻoga lelei na faataatia e le aposetolo o Paulo i le faiva?
1 Sa apoapoaʻi atu le aposetolo o Paulo iā Timoteo e faapea, “ia faia ma le māeʻaeʻa lau faiva.” (2 Timo. 4:5) I le va o le 47 ma le 56 T.A., sa faataunuuina ai e Paulo malaga faamisionare e tolu. O loo taʻua soo i le tusi o Galuega e faapea sa avatu e Paulo se “molimau māeʻaeʻa.” (Galu. 23:11; 28:23) E faapefea ona tatou faia faapea i aso nei?
2. E faapefea ona tatou avatu se molimau māeʻaeʻa pe a talaʻi mai lea fale i lea fale?
2 Mai Lea Fale i Lea Fale: Ina ia maua tagata e leʻi faalogo lava i le tala lelei, e ao ona asiasi atu i se isi taimi o le aso. Atonu e maua atu le tamā o le aiga i le afiafi, po o le faaiʻuga o le vaiaso. Ia taumafai e talanoa atu i se tagata i aiga taʻitasi, ma ia toe asia fale e leʻi maua atu i ai nisi. Ae a lē taulau au taumafaiga, e lelei ona tusi se tusi ma tuu i le fale pe telefoni atu foʻi i ai.
3. O ā avanoa e mafai ona e talaʻi atu ai i nofoaga faitele ma molimau atu lē fuafuaina?
3 I Nofoaga Faitele ma le Molimau Lē Fuafuaina: O nisi taimi e faailoa atu e auauna a Ieova “le atamai moni” i ē uma e faalogo mai, i nofoaga po o “magāala e tumutumu ai tagata.” (Faata. 1:20, 21) O loo tatou ʻmatuā tinoū e talaʻi atu le upu.’ (Galu. 18:5) A o faagasolo galuega masani o le aso, po o tatou mataalia i avanoa e molimau atu ai? Pe a faia faapea, o loo tatou faataunuuina la le tofiga ia avatu se “molimau māeʻaeʻa.”—Galu. 10:42; 17:17; 20:20, 21, 24.
4. E faapefea ona fesoasoani le tatalo ma le manatunatu loloto, e molimau atu ai ma le māeʻaeʻa?
4 Peitaʻi, ona o vaivaiga faaletagata po o le matamuli, e ono taofia ai i tatou e molimau atu. E ui i lea, e silafia e Ieova le mea e gata mai ai lo tatou mafai. O lea ia tatalo atu iā Ieova mo le lototele e tautala atu ai. (Sala. 103:14; Galu. 4:29, 31) E lē gata i lea, ia faia suʻesuʻega a le tagata lava ia ma manatunatu loloto i le Afioga a le Atua, ona faaloloto ai lea o le talisapaia o le matuā tāua o le tala lelei. (Fili. 3:8) O le a uunaʻia ai i tatou e talaʻi atu ma le maelega!
5. E faapefea ona faia so tatou sao i le faataunuuina o le valoaga a Ioelu?
5 Na valoia e le perofeta o Ioelu a o leʻi oo mai le aso tele ma le mataʻutia o Ieova, o le a ʻō atu pea’ ona tagata ma e leai se mea e taofia ai i latou e talaʻi atu. (Ioe. 2:2, 7-9) Tau ina ia faia atoatoa so tatou sao i lenei galuega talaʻi o le a lē toe faia lava!