Ia Faaaʻoaʻo i le ʻAuperofeta—Hosea
1. O le ā le fesili atonu e te ono tuufesili ai?
1 O ā mea ua ou lotomalie e faataulaga mo Ieova? Atonu e te ono tuufesili i lenā fesili pe a e mafaufau loloto i le agalelei ma le alofa mutimutivale o le Atua. (Sala. 103:2-4; 116:12) Na lotomalie le perofeta o Hosea e faia le mea na faatonuina ai o ia e Ieova, e ui e manaʻomia ai se faataulaga. E faapefea ona tatou faaaʻoaʻo iā Hosea?
2. Aiseā ua avea ai Hosea ma faaaʻoaʻoga lelei mo i tatou ina ia tatou maumauaʻi ai pea i le talaʻiga?
2 Talaʻi i Taimi e Lē Sologa Lelei Ai: Na tuusaʻo le feʻau a Hosea i le ituaiga e sefulu o le malo o Isaraelu, lea na toetoe lava ina tafiesea ai le tapuaʻiga moni. Na faia e le tupu o Ierepoamo II mea inosia i luma o Ieova, ma faaauau ona ia faia le tapuaʻiga i le tamaʻi povi lea na amataina e Ierepoamo I. (2 Tu. 14:23, 24) Na faaauau pea ona faia e tupu na sosoo ane o le ituaiga e sefulu o le malo o Isaraelu ia mea inosia, seʻia oo i le taimi na faaumatia ai i le 740 T.L.M. Peitaʻi, e ui i le faateteleina o tapuaʻiga sesē, ae na auauna pea ma le faamaoni Hosea o se perofeta pe tusa ma le 59 tausaga. Pe e lē o faapena foʻi lo tatou maumauaʻi e talaʻi mai i lea tausaga i lea tausaga, e ui i le lē fiafia ma le tetee mai o tagata?—2 Timo. 4:2.
3. Na faapefea i le olaga o Hosea ona faaatagia mai ai le alofa mutimutivale o Ieova?
3 Taulaʻi i le Alofa Mutimutivale o Ieova: Na faatonuina e Ieova Hosea ina ia alu ma “fai avā i le fafine faitaaga.” (Ho. 1:2) E ui lava e na o le tasi la laʻua tama na fanaua e lana avā o Komeri, ae na mulimuli ane fanaua e Komeri isi tamaiti e toʻalua e ese lo la tamā. O le lotomalie o Hosea e faamagalo lana avā, na faaatagia mai ai le alofa mutimutivale o Ieova i tagata lē usiusitaʻi o Isaraelu ina ua latou salamō. (Ho. 3:1; Roma 9:22-26) Po o tatou lotomalilie e faataulaga mea e tatou te mananaʻo i ai, ina ia mafai ona faailoa atu le alofa mutimutivale o Ieova i tagata o ituaiga uma?—1 Kori. 9:19-23.
4. O ā nisi faataulaga e ono mafai ona tatou faia mo Ieova?
4 Ua faataulaga e nisi o auauna a Ieova galuega e lelei totogi, ina ia faatele ai lo latou taimi i le fanua. O nisi ua lotomalilie e nofofua pe lē faia foʻi ni fanau ina ia faamuamua ai manaʻoga o le malo. Pe a mafaufau i le mea na tupu i le olaga o Hosea, e te ono tomānatu, ʻE lē mafai ona ou faia le mea na ia faia.’ Ae ui i lea, pe a tuputupu aʻe lo tatou talisapaia mo le agalelei o Ieova ma faalagolago atu i lona agaga paia mo le malosi, e ono faaaogā la i tatou e Ieova i se mea e tatou te manatu e lē mafai ona tatou faia, e pei lava o Hosea.—Mata. 19:26; Fili. 2:13.