O le ā le Silasila Mai a Ieova iā te Aʻu?
1. Ua faapefea ona pei le Tusi Paia o se faata?
1 E faafia ona e vaai i le faata? O le toʻatele o i tatou e faia faapea i aso uma, ina ia iloa ai ni mea e ao ona faaleleia. Ua pei le Tusi Paia o se faata. E fesoasoani le faitauina o le Tusi Paia iā i tatou e iloa ai lo tatou tagata i totonu lea o loo silasila i ai Ieova. (1 Samu. 16:7; Iako. 1:22-24) O le Afioga a le Atua e mafai ona “faamasino i manatu ma faanaunauga o le loto.” (Epe. 4:12) E faapefea i le faitau ma mafaufau loloto i le Tusi Paia i aso taʻitasi ona tatou iloa ai ni mea e faaleleia, ina ia avea ai o ni faievagelia taulau manuia?—Sala. 1:1-3.
2. E faapefea ona fesoasoani le Tusi Paia e iloilo ai le tulaga o le tagata lava ia?
2 Ia Faaaogā le Tusi Paia e Pei o se Faata: O faaaʻoaʻoga faale Tusi Paia i nisi o auauna a Ieova, ua tatou aʻoaʻoina mai ai uiga matagofie e fiafia i ai o ia. O se faataʻitaʻiga, e tatou te aʻoaʻoina mai ia Tavita le maelega mo le suafa o Ieova. (1 Samu. 17:45, 46) Na lototele Isaia e tauofo atu e alu e talaʻi i le oganuu e faigatā le tulaga o mea. (Isa. 6:8, 9) O le alofa loloto o Iesu i lona Tama i le lagi na ia vaai ai i lana faiva o se puna o faalaeiauga ma maua ai le faamalieina, nai lo le avea ma avega mamafa. (Ioa. 4:34) I uluaʻi senituri, na talaʻi atu Kerisiano ma le maelega, faalagolago iā Ieova ma e leʻi fiugofie. (Galu. 5:41, 42; 2 Kori. 4:1; 2 Timo. 4:17) O le mafaufau loloto i na faaaʻoaʻoga, o le a faia ai se iloiloga a le tagata lava ia ma le faanaunauga, e faaleleia lana auaunaga paia iā Ieova.
3. Aiseā e lē tatau ai ona tatou fai mea tuu i le faia o ni suiga manaʻomia?
3 Gaoioi e Faia ni Suiga: E mautinoa e lē aogā le tau ina vaai i le faata ma lē amanaʻia ni mea o faalētonu ai o tatou foliga. E tatou te tatalo atu iā Ieova e fesoasoani mai iā i tatou, e iloa o tatou vaivaiga ma faia ni suiga manaʻomia. (Sala. 139:23, 24; Luka 11:13) Talu ai ua itiiti le taimi o totoe ma e aafia ai ola, e lē tatau ai ona tatou fai mea tuu i le faia o suiga e manaʻomia.—1 Kori. 7:29; 1 Timo. 4:16.
4. O le ā e tupu i le tagata e faitau i le Afioga a le Atua ma gaoioi loa e faia ni suiga?
4 E silasila Ieova i o tatou tagata lilo aua e sili atu lona tāua nai lo o foliga mai i fafo. (1 Pete. 3:3, 4) O le ā e tupu i se tagata e faitau i le Afioga a le Atua ma gaoioi loa e fai se suiga? O le a avea o ia o sē e “faalogologo ma le lē faagalogalo, o le a fiafia ai o ia ona o lona faia o lea galuega.” (Iako. 1:25) Ioe, o le a tatou maua le fiafia ma avea i tatou o ni faifeʻau tomai a o “atagia atu i o tatou foliga e lē ufiufia le mamalu o Ieova e pei o ni faata.”—2 Kori. 3:18.