Ia Faaaogā Lelei le Faata

Na faatusa e Iakopo le Tusi Paia i se faata, lea e mafai ona tatou iloa ai mea moni o loo i o tatou loto po o le tagata lilo i totonu. (Iako. 1:​22-25) E faapefea ona tatou faaaogā lelei le Tusi Paia e pei o se faata?

Ia faitau lelei i ai. Pe afai e faatopelau la tatou tilotilo i le faata, atonu o le a tatou lē iloa atu ni faalētonu e manaʻomia ona faaleleia. Ina ia iloa ni mea o loo i o tatou loto po o le tagata lilo i totonu, lea e manaʻomia ona faaleleia, e ao ona tatou vaavaai totoʻa i le Afioga a le Atua e ala i le faitau lelei i ai.

Ia uaʻi iā te oe lava nai lo o isi. O nisi taimi pe afai e te tū i autafa o le faata, e te ono iloa atu ai se isi tagata ma ni mea o loo faalētonu i ona foliga po o teuga. I se tulaga taitutusa, e tatou te ono faaaogāina foʻi le Tusi Paia ina ia iloa ai sesē o isi. Peitaʻi, o le faia faapea o le a lē fesoasoani ina ia faasaʻo ai o tatou lava sesē.

Ia magafagafa. Pe afai e tatou te vāai i le faata ma uaʻi tau lava o mea o loo faalētonu, e tatou te ono lagona ai le lē fiafia. E manaʻomia ona tatou magafagafa a o faitauina le Afioga a le Atua, e ala i lo tatou lē faatalitalia o ni mea e sili atu nai lo o mea e faatalitalia e Ieova mai iā i tatou.—Iako. 3:17.