Faaaogā le jw.org i Lau Faiva

O la tatou tuatusi i le initaneti o se meafaigaluega aogā tele e faalauiloa atu ai le tala lelei i “tuluʻiga uma o le lalolagi.” (Galu. 1:8) O le toʻatele o tagata i le oganuu e latou te lē iloaina le tuatusi o le jw.org, sei vaganā ua faailoa atu i ai e se tagata talaʻi.

Na tuu e se ovasia femalagaaʻi i lana telefoni le vitiō Aiseā e Suʻesuʻe ai le Tusi Paia?, ma faaali atu i so o se avanoa e na te mauaina. O se faataʻitaʻiga, pe a talaʻi mai i lea fale i lea fale e masani ona faapea atu: “O loo ou asia puupuu tagata ina ia fesoasoani i ai e saʻili tali o fesili tāua nei: Aiseā ua tele ai faafitauli i le lalolagi? O le ā le auala o le a foʻia ai e le Atua? E faapefea ona tatou onosaia nei faigatā i le taimi lenei? O loo faamatilatila mai na fesili i lenei vitiō.” A uma, ona ia faaali saʻo atu lea i le tagata ma mātaʻitū ona foliga vaaia. O lenei vitiō e faaoso naunau ma o le toʻatele o tagata e fiafia e maimoa i ai seʻia oo i le faaiʻuga. Pe a māeʻa le vitiō ona toe faapea atu lea o le ovasia: “O lenā ua e faafofoga atu i ai, e mafai ona e talosaga mo se suʻesuʻega faale-Tusi Paia i le initaneti, ma e mafai ona ou faataʻitaʻi atu le auala e faia ai se suʻesuʻega.” Pe a malie i ai le tagata, ona ia faataʻitaʻi lea o le faiga o le suʻesuʻega e faaaogā ai le polosiua Tala Lelei. Pe a lē avanoa le tagata, ona faia lea e le ovasia o se fuafuaga e faataʻitaʻi i le asiasiga e sosoo ai. Pe a mālōlō foʻi i se faleʻaiga, e taumafai lava e amata se talanoaga faaleuō ma se tasi i inā ma faaali atu i ai le vitiō. O lea, po o e faaaogā le jw.org i lau faiva?