Pese Fou mo le Tapuaʻiga!
1 I le fonotaga faaletausaga talu ai nei a le Watch Tower Bible and Tract Society of Pennsylvania, lea na faia iā Oketopa 4, 2014, na faasilasila ai o le a toe teuteuina la tatou tusi pese o loo iai nei. E mautinoa o se tala fiafia lenā tala! Sa faamanatu iā i latou uma na auai le tāua o pese o le Malo i la tatou tapuaʻiga.—Sala. 96:2.
2 Atonu e te taumānatu, ʻAiseā o le a toe teuteu ai le tusi pese?’ O nisi nei o māfuaaga. Muamua, o loo faaauau ona tupu tele lo tatou malamalamaga i le Tusi Paia, ma e iai sona aafiaga i upu o a tatou pese. (Faata. 4:18) O se isi māfuaaga, o le tele o upu ma faaupuga o loo faaaogā i la tatou tusi pese o loo iai nei, e mai i le Faaliliuga a le Lalolagi Fou na iai muamua atu. Ua tatau ona toe fetuunaʻi na upu ina ia ōgatusa ma upu ma faaupuga o le lomiga faa-Peretania ua toe teuteuina. E tele galuega e manaʻomia ina ia toe fetuunaʻi ai upu o pese, ma o lea ua filifili ai foʻi e faaopoopo ni pese fou i le tusi pese.
3 Po o le a tatou faatali seʻi lolomi mai se tusi pese fou ona faatoʻā mafai lea ona faaaogā pese fou? E leai. E fiafia e faailoa atu e faapea, i ni masina o loo lumanaʻi nei, o le a tuuina ai nisi o pese fou i la tatou upega tafaʻilagi o le jw.org. Pe a iai se pese fou, o le a faailoa atu i le faaiʻuga o se faasologa mo le Sauniga o le Auaunaga, e tusia ai le faaupuga “pese fou.”
4 Auala e Aʻo ai Pese Fou: O se luʻi le aʻoina o se pese fou. Peitaʻi, i le pei o le faisalamo, e tatou te mananaʻo e “lē mapu” ona pepese i sauniga a le faapotopotoga. (Sala. 30:12) Ina ia aʻo se pese fou, ia mulimuli i auala faigofie nei.
Ia fai ma faalogologo i le fati o le pese lea o le a tuu i luga o la tatou upega tafaʻilagi. O le tele e te faalogologo ai i le fati o le pese, o le faigofie foʻi lenā ona e manatua.
Faitau upu o le pese ma taumafai e tauloto.
Tā le pese ona usu faatasi lea ma upu, seʻia oo ina e iloa lelei le pese.
Faaalu sina taimi o la outou Tapuaʻiga a le Aiga e faataʻitaʻi ai pese fou, seʻia oo ina iloa lelei e lou aiga.
5 Pe a faatulaga atu i faasologa o Sauniga o le Auaunaga i masina o loo lumanaʻi nei, e faaiʻu le sauniga i se pese fou, o le a tā muamua le pese ae faalogologo ai le faapotopotoga. Pe a uma, ona toe tā lea ae usu faatasi ma upu.
6 O le mea moni, o le usuina o pese i a tatou sauniga, o lenā ua tuufaatasi ai ma le fiafia o tatou leo e vivii atu iā Ieova. O lea, e lē tatau ona fai ma a tatou masani le ō ese mai i o tatou nofoa e aunoa ma se māfuaaga tatau, i taimi e usu ai pese i a tatou sauniga.
7 E iai se isi auala e faaalia ai le talisapaia o a tatou pese paia. I fonotaga ma tauaofiaga, e iai ni pese e tātā a o leʻi amata vaega taʻitasi. E faalua i le tausaga ona totogi e o tatou uso ma tuafāfine mai i itu eseese o le lalolagi o latou lava pasese, e malaga ai i Patterson i Niu Ioka ina ia saunia pese matagofie mo la tatou tapuaʻiga. O lea, pe a valaaulia e le taʻitaʻifono ia alaala i o tatou nofoa ma faalogologo atu i pese o le a tātāina mai, e tatau loa ona tatou faia faapea. O lenei faiga o le a fesoasoani e saunia ai o tatou loto mo faamatalaga o le a tatou faalogologo i ai.—Esera 7:10.
8 O le a faaiʻu la tatou sauniga i lenei pō i le usuina o le pese fou e faamatuaina “Ia Oo Mai le Malo ua Faavaeina!” O lenei pese sa faasilasila i le fonotaga faaletausaga na mavae nei, ma na tuufaatasia faapitoa ina ia faailogaina ai le 100 tausaga talu ona faavae le Malo.
9 E mautinoa o pese fou o ni “mea lelei” mai iā Ieova. (Mata. 12:35a) Seʻi o tatou maumauaʻi e aʻo nei pese fou ma usu mai i o tatou loto, ina ia viia ma faamamaluina ai lo tatou Atua.—Sala. 147:1.