Faaaogā le Upega Tafaʻilagi i le Talaʻiga​—“Ia Avea ma Uō a Ieova”

I la tatou Upega tafaʻilagi, o loo iai se vaega ua taʻua “Aʻoaʻoga a le Tusi Paia.” I inei, o loo iai se vaega mo tamaiti ua taʻua “Avea Oe ma Uō a Ieova,” o loo iai pese, vitiō ma mea e fai. Po ua e faaaogāina lenei vaega i le talaʻiga? Pe afai o loo e suʻesuʻeina le Tusi Paia ma se matua e iai sana fanau lāiti, aiseā e lē faaali atu ai lea vaega i lenā matua? O le faia faapea atonu e uunaʻia ai le matua e faalautele atu lona iloa i isi vala o la tatou Upega tafaʻilagi.

A o tufatufa atu e se uso le Tala o le Malo Nu. 38, sa feiloaʻi ai i se fafine na faitauina le sāvali i le taimi lava na tuuina atu ai iā te ia. Sa iai se fanau lāiti a le fafine ma sa naunau tamaiti e fia iloa e faatatau i le sāvali. Sa faamatala puupuu atu e le uso faamatalaga o loo iai i le sāvali, ma faasino i ai la tatou tuatusi i le Upega tafaʻilagi o loo i le pito i tua. Talu ai sa fiafia le fafine, o lea na faaaogā ai e le uso le avanoa e faaali ai i le fanau a le fafine se tasi o vitiō a Caleb mo tamaiti, e faaaogā ai lana telefoni feaveaʻi.

Sa faamatala atu e se tuafafine i se fafine e la te faigaluega faatasi ma e iai sana fanau lāiti, la tatou Upega tafaʻilagi ma faamatalaga o loo iai mo aiga. Sa suʻe e le fafine ma lana fanau le jw.org i le Initaneti. Mulimuli ane, sa faamatala e le fafine i le tuafafine e faapea, e usu soo e lana fanau i le fale le pese “Ia Talaʻi Atu le Upu,” o se tasi o pese o loo i le vaega “Become Jehovahʻs Friend.”

Ia faamasani i lenei vaega o la tatou Upega tafaʻilagi, ma kopi i lau telefoni feaveaʻi se vitiō, se mea e fai, po o se pese o loo iai, ma taumafai e faaaogā i le talaʻiga. O se meafaigaluega tāua tele lenei e fesoasoani iā i tatou e pologa ai mo le Alii!​—Galu. 20:19.