Auala e Molimau Atu ai e Ala i se Laulau po o se Fata e Faaali ai Tusi ma Mekasini

Ua faamaonia le aogā o le molimau atu e ala i se laulau po o se fata e faaali ai tusi ma mekasini, ina ia tosina mai ai i le upu moni ē e lotofaamaoni. (Ioa. 6:44) O lea ua faalaeiauina ai toeaina ia faatulaga ni talaʻiga i nofoaga faitele e tumutumu ai tagata i le oganuu a le faapotopotoga. Talu ai o laulau ma fata e lē o ni mea e tumau ona iai i se nofoaga, e masani lava la e lē tau manaʻomia ona talosaga mo se faatagaga mai i pulega o ia nofoaga. Peitaʻi afai e iai ni tulafono a le atunuu e manaʻomia ai ona talosaga mo se faatagaga, e tatau la ona faia faapea. O ē e agavaa mo lenei ituaiga o talaʻiga, e aofia ai tagata talaʻi e faautauta, talanoa atu i se auala faaaloalo, ma iai tomai i le amataina ma le faia o talanoaga. I le vaega o loo mulimuli mai, o nisi ia o mea e fai, ma mea e aua le faia, ina ia fesoasoani i le ʻautalaʻi e taulau manuia atili ai.

Mea e Fai:

Ia faaleuō, foliga ʻataʻata, ma fesoasoani i tagata e pasi ane. O nisi tagata talaʻi e ʻataʻata ma fai atu se faafeiloaʻiga faaleuō. Pe afai e savali ane se tasi ma autilo mai i le laulau po o le fata, e te ono faapea atu, “E mafai ona ave sau tusi pe a e manaʻo i ai.”
Ia fuafua lelei le mamao o le mea e te tū ai mai i le fata po o le laulau. I nisi nofoaga, ua iloa e le ʻautalaʻi le aogā o le tutū faalatalata i le fata po o le laulau. Ae ua iloa e isi, o le faia faapea e mumusu ai tagata e tutū atu. O lea e latou te tutū ai tau faamamao ese mai ma faatalitali seʻi tū atu se tagata i le fata po o le laulau. Pe a faalatalata atu se tagata, taumafai e talanoa i ai, atonu e ala i le fesili atu, “Pe sa iai se taimi na e taumānatu ai i lenā fesili?”
Ia faaaogā i taimi uma le Tusi Paia pe a talafeagai.
Faamatala atu le faatulagaga o suʻesuʻega faale-Tusi Paia, i so o se tasi e aveina se tasi o a tatou lomiga mo suʻesuʻega, e pei o le tusi Aʻoaʻoga Moni. Fai i ai seʻi faaali atu le vitiō Aiseā e Suʻesuʻe ai le Tusi Paia? e faaaogā ai se telefoni po o se isi masini.
Pe a talafeagai, fesili i se tagata fiafia mo se auala e faafesootaʻi ai o ia. Pe afai e lē nofo le tagata i le tou oganuu, faafesootaʻi se tagata talaʻi e i le oganuu a le tagata ina ia toe tuliloa lona fiafia.