Aʻoaʻo Atu e Faaaogā ai le Polosiua Tala Lelei
1. O le ā le auala ua tusia ai le polosiua o le Tala Lelei?
1 E pei ona taʻua i La Tatou Faiva o le Malo o Iulai, o se tasi o a tatou meafaigaluega tāua e aʻoaʻo atu ai, o le polosiua o le Tala Lelei Mai i le Atua! Ina ia mafai e le tagata ona suʻe i lana Tusi Paia ma aʻoaʻo mai ai le upu moni, e lē o siiina mai i le polosiua mau o loo taʻua ai. E ui o le tele o a tatou lomiga e tusia i se auala e mafai ai e se tagata ona aʻoaʻoina ia lava, ae o lenei polosiua ua tusia i se auala e manaʻomia ai se tasi e fesoasoani atu. O lea, pe a ofo atu lenei polosiua, e ao ona tatou taumafai e faataʻitaʻi le auala e faia ai se suʻesuʻega faale-Tusi Paia, ina ia iloa ai e le tagata e maua le olioli pe a aʻoaʻoina le tala lelei mai i le Tusi Paia.—Mata. 13:44.
2. E faapefea ona tatou faaaogā le polosiua o le Tala Lelei i le uluaʻi asiasiga?
2 I le Uluaʻi Asiasiga: E te ono faapea atu: “O le toʻatele ua popole i le lumanaʻi o le fanau a tagata. Pe e te manatu e iai se taimi o le a faaleleia ai le tulaga o le lalolagi? [Faatali mo se tali.] Ua iai i le Tusi Paia tala lelei e mafai ona aumaia ai le faamoemoe. O nisi nei o fesili o loo maua i le Tusi Paia o latou tali.” Tuu atu i le tagata le polosiua, ma fai i ai e filifili mai se fesili i le pito i tua e fia talanoa i ai. Ia faataʻitaʻi le auala e faia ai se suʻesuʻega e ala i le talanoaina o le uluaʻi palakalafa o lenā lesona. O se isi auala e mafai ona fai, o lou fai atu i le tagata o se fesili faatupu manatu e faavae mai i se lesona ua e filifilia, ona faataʻitaʻi lea o le auala e fesoasoani ai le polosiua i le tagata ina ia maua le tali mai i le Tusi Paia. Pe afai e iai se vitiō i le jw.org e fetaui ma lenā lesona, o nisi tagata talaʻi e latou te faaali lenā vitiō a o faia le talanoaga.
3. Faamatala le auala e fai ai se suʻesuʻega i le polosiua o le Tala Lelei.
3 Le Auala e Fai ai le Suʻesuʻega: (1) Faitau le fesili matamata tetele o loo faafuainumera mai, ina ia fesoasoani i le tagata e uaʻi atu ai i le manatu autū. (2) Faitau le palakalafa o loo sosoo ma le fesili. (3) Faitau mau o loo tusi faasisipa, ma faaaogā ma le faautauta fesili ina ia fesoasoani i le tagata e iloa ai le auala o loo taliina ai e mau le fesili o loo faafuainumera mai. (4) Pe afai o loo iai se isi palakalafa i lenā lava fesili, ia toe fai le laasaga lona 2 ma le 3. Pe afai e iai se vitiō e fetaui ma lenā fesili ma e te leʻi faaaliina i le tagata o le fale, ia faaali i ai a o faagasolo la oulua talanoaga. (5) Pe a uma, ia fai atu le fesili o loo faafuainumera ma faatali mo le tali a le tagata, ina ia faamautinoa ai po o malamalama o ia.
4. O le ā e fesoasoani iā i tatou ina ia faaaogā ai lenei meafaigaluega tāua i se auala tomai?
4 Ia faamasani i lenei meafaigaluega tāua, ma ia faaaogā i so o se taimi e talafeagai ai. A o leʻi amata a oulua suʻesuʻega taʻitasi, ia mafaufau i lau tagata aʻoga ma le auala sili e mafai ona fetufaaʻi ai ma ia, e faaaogā ai mau o loo i le lesona. (Faata. 15:28; Galu. 17:2, 3) A o e maua le poto masani ma le tomai, o le a avea lenei polosiua o se tasi o meafaigaluega, e te fiafia e aʻoaʻo ai tagata i le upu moni.