E Manatu Mamafa Mai Lē na Foafoaina i Tatou
1. O LĒ NA FOAFOAINA I TATOU E NA TE FAAOSO AʻE LE LĀ
E lē mafai ona tatou ola i le lalolagi e aunoa ma le lā. E avatu e le lā le malosi i le laau ina ia gaosia ai ona lau, fugālaau, o ona fua ma fatu. E mafai ai foʻi e le laau ona mitiia le vai mai i le palapala e ala i ona aa, faasoa atu i ona lau, ma faamatuu atu i le ʻea ma avea ai ma ausa.
2. O LĒ NA FOAFOAINA I TATOU E NA TE FAATOTŌ IFO LE TIMU
O le timu o se meaalofa tautele mai i le Atua, lea e mafai ai e le laueleele ona gaosia meaʻai e tatou te aai ai. E foaʻi mai e le Atua le timu ma fuata o tau, lea e faamalieina ai i tatou i meaʻai ma faatumulia ai o tatou loto i le olioli.
3. O LĒ NA FOAFOAINA I TATOU E NA TE SAUNIA MEAʻAI MA LAVALAVA
O le toʻatele o tamā e popole ia lava meaʻai ma lavalava mo o latou aiga. Ia mātau manatu o le Afioga a le Atua: “Ia vaavaai lelei i manufelelei o le lagi, auā latou te lē lūlū ni fatu pe selesele, pe faaputu i se fale teuoloa, ae e fafagaina i latou e lo outou Tamā o i le lagi. Pe e lē sili ea ona tāua outou i lo o na manufelelei?”—Mataio 6:25, 26.
“Ia aʻoaʻo se lesona mai lili o le vao, o loo ola ae lē galulue . . . Ae ou te fai atu iā te outou, e oo lava [i le tupu o] Solomona ma lona mamalu uma, e leʻi tutusa lona matagofie ma se tasi o nei lili. O lenei, afai ua faaofuina e le Atua laau o le vao . . . , pe e lē sili ea ona ia faaofuina outou?”—Mataio 6:28-30.
Talu ai e mafai e le Atua ona saunia meaʻai ma lavalava, e mautinoa foʻi e mafai ona ia fesoasoani iā i tatou e saʻilia isi mea manaʻomia o le olaga. Pe a tatou saʻili e faia le finagalo o le Atua, o le a ia faamanuia a tatou taumafaiga i le totōina o meaʻai, po o le fesoasoani mai foʻi ia maua ni galuega e mafai ai ona faatau mea e tatou te manaʻomia.—Mataio 6:32, 33.
O le mea moni, e iai māfuaaga lelei e tatou te alolofa ai i le Atua pe a tatou mātauina le lā, le timu, manu ma fugālaau. O le mataupu e sosoo ai, o le a talanoa i le auala e fesootaʻi ai Lē na foafoaina i tatou ma tagata.