AUALA E OLA AI O SE KERISIANO

Ia Maua le Olioli i le Talaʻia o le Tala Lelei

Pe e iai se taimi e faigatā ai ona e talaʻi? E toʻatele e ono tali mai ioe. Aiseā? Atonu e masani ona lē ano pe tetee mai tagata i le oganuu, pe e tatou te popole foʻi e talanoa i tagata ese. O nei vala e mafai ona mou atu ai le olioli. Peitaʻi o loo tatou tapuaʻi i se Atua fiafia, e finagalo e tatou te auauna iā te ia ma le fiafia. (Sl 100:2; 1Ti 1:11) O ā ni māfuaaga lelei se tolu e tatou te fiafia ai e talaʻi?

Muamua, o loo tatou faalauiloa atu le feʻau o le faamoemoe. E ui ua faasolo ina leai se faamoemoe o tagata i aso nei, ae e mafai ona tatou faatumulia o latou loto i se “tala lelei i mea e sili ona lelei.” (Isa 52:7) E mafai foʻi ona tatou maua le olioli i le tala lelei o le Malo o le Atua. A o tatou leʻi talaʻi atu, ia manatunatu loloto i faamanuiaga o le a aumaia e le Malo o le Atua i le lalolagi.

Lua, o le tala lelei o loo tatou talaʻia e maua ai e tagata aogā i le itu faaletino ma le faaleagaga. E aʻoaʻoina ai i latou e lafoaʻi masaniga leaga ma maua le faamoemoe o le ola e faavavau. (Isa 48:17, 18; Ro 1:16) E tai pei o loo tatou auai i se galuega e saʻili ma laveaʻi tagata. E ui e lē mananaʻo nisi tagata e laveaʻia i latou, ae e tatou te saʻili pea mo ē o loo mananaʻo i le laveaʻiga.—Mat 10:11-14.

Lona tolu, ma o le vala e sili ona tāua, o la tatou talaʻiga e faamamaluina ai Ieova. E na te matuā faatāuaina la tatou talaʻiga. (Isa 43:10; Epe 6:10) Ua ia foaʻi mai foʻi lona agaga paia ina ia faataunuu ai lenei galuega. O lea, ia tatalo iā Ieova mo le olioli, o se vala o le fua o le agaga paia. (Ka 5:22) O lana fesoasoani, e mafai ai ona tatou fesagaʻia popolega ma talaʻi atu ma le lototele. (Ga 4:31) O lea, e tusa po o le ā le tali mai a tagata i le oganuu, ae o le a tatou maua pea le fiafia i lo tatou tofiga o le talaʻi atu.—Esk 3:3.

Uiga eseese e faaalia i le galuega talaʻi—lē fiafia ma le olioli — O lē fea uiga e te manaʻo e faaalia pe a e auai i le faiva? E faapefea ona e faaalia atu le olioli?

MAIMOA I LE VITIŌ TOE MAUA LE OLIOLI E ALA I LE SUʻESUʻE MA MANATUNATU LOLOTO, ONA TALI LEA O FESILI NEI:

Aiseā e tatau ai ona faamuamua le fafagaina o i tatou faaleagaga, e tusa pe tele itula e tatou te faaalu i le talaʻiga i masina taʻitasi?
O le ā se auala e tatou te faaaʻoaʻo ai iā Maria?
O ā taimi e te manatunatu loloto ai i le Afioga a le Atua?
O ā ni vala e te maua ai le fiafia pe a talaʻia le tala lelei?