Po ua E Nofosauni mo Taimi o Faalavelave?

A o latalata atu i le iʻuga o lenei faiga o mea, e tatou te faatalitalia o le a iai fetauaʻiga, faiga faatupu faalavelave, ma o le a faateteleina taua. (Fal 6:4) E faapefea ona e sauniuni e fesagaʻia luʻi i le lumanaʻi?

• Sauniuni i le itu faaleagaga: Iloilo mataupu faale-Tusi Paia ma tala e mafai ona faamalosia ai lou faatuatua iā Ieova ma lana faalapotopotoga, ma fesoasoani e tumau ai pea ona solitū. (Fat 12:5; jr-E 125-126 ¶23-24) O le taimi lenei e atiaʻe ai ni faauōga malosi i le faapotopotoga.—1Pe 4:7, 8

• Sauniuni i le itu faaletino: Fai fuafuaga ina ia malupuipuia mea e nonofo ai ma faamautinoa ua lava mea manaʻomia. E lē gata i lea, ia fai foʻi se fuafuaga i le mea e fai pe a manaʻomia ona tuua lou fale. Toe iloilo mea o loo i totonu o lau ato mo faalavelave faafuaseʻi, ma tuu ai tupe ma mea e manaʻomia e puipuia ai mo le saogalemu, e pei o totinilima ma tali fofoga. Ia iloa le auala e faafesootaʻi ai toeaina ma faamautinoa ua latou iloa le auala e faafesootaʻi mai ai oe.—Isa 32:2; g17.5 3-7

Ia faatumauina se faasologa faaleagaga i taimi o faalavelave. (Fil 1:10) ʻAlofia le siitia mai i lea nofoaga i lea nofoaga, seʻi vaganā ua manaʻomia. (Mat 10:16) Faasoa atu i isi meaʻai ma mea manaʻomia.—Ro 12:13.

MAIMOA I LE VITIŌ PO UA E NOFOSAUNI MO MALA FAALENATURA?, ONA TALI LEA O FESILI NEI:

• E faapefea ona fesoasoani mai Ieova i taimi o mala faalenatura?

• O ā mea e mafai ona tatou faia e sauniuni ai?

• E faapefea ona tatou fesoasoani i isi ua aafia i mala faalenatura?