Po o E Faaaogā Lelei le Tusi Paia ua Uma Ona Puʻeina?

O le ā le Tusi Paia ua uma ona puʻeina? O le puʻeina lea o le faitauina o le Tusi Paia o le Faaliliuga o le Lalolagi Fou ua uma ona teuteuina, ma o loo faasolosolo ona tatalaina i le tele o gagana. O se tasi o ona vala mataʻina, o le eseese o leo e faaaogā mo tagata o le Tusi Paia. O le auala e faitau ai, e maua lelei ai faalogona ma faamamafaga talafeagai, ina ia aumaia ai ma le saʻo le feʻau o le Tusi Paia.

O ā aogā ua maua e nisi mai i le Tusi Paia ua uma ona puʻeina? O i latou e masani ona faalogologo i ai, ua atili ai ona moni iā i latou le Tusi Paia. O le faalogologo i leo eseese o loo faaaogā mo tagata o le Tusi Paia, ua mafai ai ona faaata mea na tutupu, ma maua ai se malamalamaga manino o mea ua tusia. (Fat 4:5) O le toʻatele foʻi o isi e faalogologo ai, e maua ai le toʻafilemu pe a feagai ma popolega.—Sl 94:19.

O le faalogologo i le Afioga a le Atua a o faitau leotele, e iai se aafiaga tele i o tatou olaga. (2No 34:19-21) Pe afai ua maua le Tusi Paia ua uma ona puʻeina i se vaega po o le Tusi Paia atoa i se gagana e te malamalama ai, pe e mafai ona avea le faalogologo i ai o se vaega o lau faasologa faaleagaga?

MAIMOA I LE VITIŌ SAUNIAINA O LE TUSI PAIA UA UMA ONA PUʻEINA—VAAIGA PUUPUU, ONA TALI LEA O LE FESILI LENEI:

O le ā se mea e te maofa ai i le sauniaina o le Tusi Paia ua uma ona puʻeina?