Tausisi i Lau Faasologa o le Faitauina o le Tusi Paia

Pe e faigatā iā te oe ona e tausisi i le faitauina o le Tusi Paia i aso taʻitasi, ona o le tele o mea e pisi ai? (Iosua 1:8) Pe afai o lea, ia faataʻitaʻi fautuaga nei:

• Ia iai se faamanatu i aso taʻitasi. Ia seti i lau telefoni se faamanatu po o se alarm mo aso taʻitasi, e faamanatu atu ai lau faitauga Tusi Paia.

• Ia tuu lau Tusi Paia i se mea e faigofie ona iloa atu. Pe afai e te faaaogāina se kopi lolomi o le Tusi Paia, ia tuu i se mea e faigofie ona tau i ai lau vaai i aso uma.—Teu. 11:18.

• Ia faalogologo i le faitauina o le Tusi Paia ua uma ona puʻeina. E mafai ona e faalogologo i ai a o faia au feʻau masani o le aso. Ua faapea mai Tara, o se tinā e faigaluega i le pō ma o se paeonia foʻi: “O le faalogologo i le faitauina o le Tusi Paia a o faia aʻu feʻau masani, e faamautinoa ai e lē misi laʻu faitauga Tusi Paia i le aso.”

• Aua e te faavaivai. Pe a tulaʻi mai ni tulaga lē maʻalofia ma faalavelavea ai lau faasologa o le faitauga Tusi Paia, ia taumafai pea e faitau ni nai fuaiupu a o e leʻi moe. E tusa lava pe e na o ni nai fuaiupu e te faitauina i le aso, ae e mafai lava ona e maua ai aogā.—1 Pete. 2:2.