Na Ou Faamuamua Ieova i Aʻu Filifiliga Uma

Na ou fanau iā Me 19, 1940, i le taulaga o Amioûn, i Lepanona. I ni nai tausaga mulimuli ane ai, na siitia ai lo matou aiga i le aai o Tripoli. O i inā na tausia aʻe ai aʻu i se aiga e alolofa, fiafia ma e iloa ma alolofa iā Ieova le Atua. O aʻu le uii o le fanauga e toʻalima. E toʻatolu teine ma tama e toʻalua. E lē o le mea e sili ona tāua i oʻu mātua le mauaina o tupe. Ae o mea e sili ona tāua i lo matou aiga, o suʻesuʻega faale-Tusi Paia, sauniga faa-Kerisiano ma fesoasoani i isi ia iloa le Atua.

Na iai Kerisiano faauuina i la matou faapotopotoga. O se tasi o i latou na o Michel Aboud na faia le suʻesuʻega tautusi a le faapotopotoga. Na ia maua le upu moni i Niu Ioka, ma na ia faaoo mai le upu moni i Lepanona i le 1921. O le mea e pito sili ona ou manatua ai o ia, o lona faaaloalo ma lona loto fesoasoani i talavou e toʻalua na faauu mai i le Aʻoga i Kiliata o Anne ma Gwen Beavor. Na avea i laʻua ma a matou uō lelei. Na ou feiloaʻi iā Anne i le Iunaite Setete i le tele o tausaga mulimuli ane ai. Na ou feiloaʻi foʻi iā Gwen lea ua faaipoipo iā Wilfred Gooch, ma na la auauna i le ofisa o le lālā i le Peteli i Lonetona i Egelani.

LE TALAʻIGA I LEPANONA

E lē toʻatele ni Molimau i Lepanona i le taimi o oʻu talavou. Ae na matou maelega e aʻoaʻo atu i isi mea na matou aʻoaʻoina mai i le Tusi Paia. Na matou faia faapea e ui i teteega mai i nisi o taʻitaʻi lotu. Ou te manatua lelei nisi o mea na tutupu iā i matou.

I se tasi aso, na ma talaʻi ai ma loʻu tuafafine o Sana i tagata na nonofo i se fale mautotogi. Na sau se patele i le fogāfale lea na ma talaʻi ai, atonu na vili i ai se isi. Na taufaifai atu le patele i loʻu tuafafine. Na faamisa mai ma unaʻi Sana i lalo o le faasitepu ma manuʻa ai. Na vili e se tasi leoleo, ma na faaalia e leoleo le agalelei ma fesoasoani iā Sana. Na ave e leoleo le patele i le ofisa ma iloa ai, sa ia tauaveina se tamaʻi fana. Na fesili atu i ai le taʻitaʻi leoleo: “O ai oe alii? O oe o se taʻitaʻi lotu po o se taʻitaʻi o tagata faatupu faalavelave?”

Ou te manatua lelei se mea na tupu ina ua totogi e la matou faapotopotoga se pasi, e matou te ō ai i se oganuu mamao e talaʻi ai le tala lelei. Na manaia lava le matou talaʻiga seʻia oo ina logotala se patele e nofo i lenā taulaga, ma ia faapotopotoina ai ni tagata e osofaʻia i matou. Na latou faafefe i matou ma tauʻai i maa, ma na lavea ai loʻu tamā. Ou te manatua le tafetotoi o ona foliga. Na toe foʻi loʻu tamā i le pasi ma loʻu tinā, ma na matou popole ma mulimuli i ai. E lē mafai ona galo iā te aʻu le tala a loʻu tinā na fai a o ia soloina foliga o loʻu tamā: “Ieova faamolemole, faamagalo i latou, ona e latou te lē iloa le mea ua latou fai.”

Na iai foʻi se mea na tupu ina ua matou asiasi i o matou tauaiga i lo matou nuu. O i inā na matou feiloaʻi ai ma se taʻitaʻi lotu lauiloa i le aiga o le tamā o loʻu tamā. Na iloa e lenā taʻitaʻi lotu e Molimau a Ieova lo matou aiga. Na ia fesili mai e ui e na o le ono oʻu tausaga i lenā taimi: “Oe lea, aiseā ua e lē papatiso ai?” Na ou fai i ai o lea ou te laʻitiiti ma e tatau ona ou iloa le tele o mea i le Tusi Paia ma malosi loʻu faatuatua, ona ou papatiso ai lea. E leʻi fiafia le faifeʻau i laʻu tali, ma na ia fai i le tamā o loʻu tamā ou te tautalaitiiti.

E lē tele ni mea faapena na tutupu. E masani lava o tagata Lepanona e talimālō ma e faaleuō. O lea, na matou fiafia ai i le tele o a matou talanoaga faale-Tusi Paia, ma e tele foʻi a matou suʻesuʻega faale-Tusi Paia na fai.

FILIFILI E SIITIA I SE ISI ATUNUU

A o oʻu aʻoga, na asiasi atu se uso talavou mai i Venezuela i Lepanona. Na auai o ia i sauniga a le matou faapotopotoga ma amata ai le la faauōga ma loʻu tuafafine o Wafa. Na oo ina faaipoipo ma la siitia ai i Venezuela. Na tusi mai Wafa ma tauanau loʻu tamā ina ia siitia atu lo matou aiga i Venezuela ona ua ia misia tele i matou. Na iʻu lava ina matou siitia i Venezuela.

Na matou taunuu i Venezuela i le 1953, ma matou nonofo ai i Caracas e latalata i le maota o le peresitene. A o oʻu laʻitiiti, o se mea fiafia iā te aʻu le vaai atu i le taavale a le peresitene o pasi ane i luma o le matou fale. Ae e leʻi faigofie i oʻu mātua ona faamasani i lenā atunuu, le gagana, tū ma aga, ma le tau. Ina ua amata ona la masani i le olaga i Venezuela, ae tupu loa se faafitauli tugā.

SE FAAFITAULI TUGĀ

Na lagona e loʻu tamā ua maʻi. E fou lea mea iā i matou, ona o loʻu tamā o se tagata malosi ma soifua mālōlōina. E matou te lē manatua se taimi na maʻi ai. Na faataotolia i le kanesa o le manava ma fai ai lona taotoga. Ae o le mea e faanoanoa ai ona e tasi le vaiaso mulimuli ane ai, ae maliu loa.

E lē mafai e upu ona faamatala lo matou faavauvau i le mea na tupu. E na o le 13 oʻu tausaga i lenā taimi. Na matuā faateʻia ma lofitūina i matou i le faanoanoa, ma na matuā faigatā i loʻu tinā ona talia le maliu o lana tane. Peitaʻi, na matou iloa e lē tatau ona matou faavaivai, ma o le fesoasoani a Ieova na matou tumau ai. Na ou faauu mai i le aʻoga maualuga i Caracas ina ua 16 oʻu tausaga, ma na matuā ou manaʻo lava e fesoasoani i loʻu aiga.

I lenā taimi, na faaipoipo ai loʻu tuafafine o Sana iā Rubén Araujo lea na faauu mai i le Aʻoga i Kiliata ma ua toe foʻi mai i Venezuela. Mulimuli ane na la siitia ai i Niu Ioka. Ina ua mananaʻo loʻu aiga e faaauau aʻu aʻoga i le iunivesite, na ou alu ai loa i Niu Ioka ma matou nonofo faatasi ai ma Sana ma lona toʻalua. Na fesoasoani loʻu tuafafine ma lona toʻalua i loʻu tuputupu aʻe faaleagaga a o matou nonofo faatasi. E lē gata i lenā, e toʻatele uso taʻumatuaina faaleagaga i la matou faapotopotoga faa-Sipaniolo i Brooklyn. O nisi o i latou na ou masani lelei ai ma talisapaia, o Milton Henschel ma Frederick Franz. Na auauna i laʻua i le Peteli i Brooklyn.

Ina ua lata ina uma loʻu tausaga muamua i le iunivesite i Niu Ioka, na amata ai ona ou mafaufau i mea o loo oʻu faia i loʻu olaga. Na ou faitau ma mafaufau loloto i mataupu o le Olomatamata e faatatau i sini aogā e faatutū e Kerisiano. Na ou vaaia le fiafia o paeonia ma tagata Peteli i la matou faapotopotoga, ma na ou manaʻo foʻi e pei o i latou. Peitaʻi, ou te leʻi papatiso i lenā taimi. E leʻi umi ae ou iloa le tāua o le tuuina atu o loʻu ola mo Ieova. Na ou tuuina atu ma mulimuli ane ou papatiso iā Mati 30, 1957.

O FILIFILIGA TĀUA

Ina ua uma ona ou papatiso, na amata ona ou mafaufau i le auaunaga faataimi atoa. Na matuā ou manaʻo e paeonia, ae na ou iloa e faigatā lenā laasaga. E faapefea ona ou faapaleni laʻu auaunaga ma laʻu faasologa i le iunivesite? E tele taimi na matou fetusiaʻi ai ma lo matou aiga, ma na ou faamatala i loʻu tinā ma nai oʻu tei i aʻu tusi laʻu filifiliga e faauma aʻu aʻoga, ae toe foʻi i Venezuela ma avea ma paeonia.

Na ou toe foʻi i Caracas iā Iuni 1957. Peitaʻi, na ou iloa e lē o lelei le tulaga o mea i lo matou aiga. Na latou manaʻomia se isi tagata o le aiga e faigaluega. E faapefea ona ou fesoasoani? Na maua saʻu galuega i se faletupe peitaʻi, na ou manaʻo lava ou te paeonia auā o le māfuaaga lenā na ou toe foʻi mai ai i Venezuela. Na ou maumauaʻi ou te paeonia ma faigaluega. Mo le tele o tausaga, na ou galue faataimi atoa i le faletupe ma ou auauna o se paeonia. Na matuā ou pisi lava ae na ou matuā fiafia foʻi!

Na atili ona ou fiafia ina ua ou feiloaʻi ma faaipoipo iā Sylvia, o se tuafafine aulelei mai i Siamani e alofa tele iā Ieova. Na siitia mai o ia i Venezuela ma ona mātua. E leʻi umi ae maua le ma fanau e toʻalua, o la ma tama tama o Michel (Mike), ma le ma tama teine o Samira. Na ou tausia foʻi loʻu tinā ma na matou nonofo faatasi. E ui ina faamuta laʻu auaunaga paeonia ona o le tausia o manaʻoga faaletino o loʻu aiga, ae na iai pea iā te aʻu le agaga faapaeonia. Na ma paeonia lagolago ma Sylvia i so o se taimi lava na mafai ai i taimi o faigāmālōlōga.

O SE ISI FILIFILIGA TĀUA

Na aʻoʻoga tamaiti i le taimi lea na tupu ai le mea na taʻua i le amataga o lenei mataupu. Ou te taʻutino atu, na sologa lelei mea uma i loʻu olaga i lenā taimi, ma na faaaloalogia aʻu e tagata faigaluega i isi faletupe. Peitaʻi, na ou manaʻo e manatu tagata iā te aʻu o se auauna a Ieova. E leʻi teʻa ese ma loʻu mafaufau mea na ou mafaufau ai i lenā aso. O lea, na ma talanoa ai ma laʻu avā e faatatau i lo matou tulaga tau tamaoaiga. Pe a ou faamavae mai i le galuega, o le a ou mauaina se tupe tele. Ona e leai ni a ma aitalafu, na ma manatu ai pe a faafaigofie o matou olaga, o le a lava a matou tupe e tausia ai o matou manaʻoga mo se taimi umi.

E leʻi faigofie ona faia lenā filifiliga. Peitaʻi, na matuā lagolagoina e si aʻu avā ma loʻu tinā. O lea o le a ou toe paeonia sauatoa. Maʻeu se fiafiaga tele! Na foliga lelei mea uma ma e leʻi umi ae matou maua se tala fiafia.

O SE TALA FIAFIA!

I se tasi o aso, na faamautinoa mai ai e le fomaʻi ua maʻitaga Sylvia. O se mea na faateʻia ai i maʻua uma. E ui o se tala fiafia, ae na ou mafaufau i le faaiʻuga ua uma ona ou faia, o le avea ma paeonia. Po o le a sui laʻu filifiliga? Na vave lava ona fetuunaʻi o ma mafaufau ma o ma faalogona ma amata ai ona ma tulimataʻia se faaopoopoga fou i lo matou aiga. Ae e faapefea laʻu filifiliga ou te paeonia?

Ina ua uma ona ma iloiloina oʻu sini, na ma filifili loa e fai pea laʻu paeonia. Na fanau le ma tama tama o Gabriel iā Aperila i le 1985. E ui i lea, ae na ou faamavae lava mai i le faletupe ma amata ona ou toe paeonia iā Iuni i le 1985. Mulimuli ane, na ou maua ai le faaeaga o le avea ma sui o le Komiti o le Lālā. Ae e lē tū le lālā i Caracas, o lona uiga ou te tausavali i le lālā i le lua i le tolu aso o le vaiaso i le mamao e 50 maila (80 kilomita).

TOE SIITIA I SE ISI NOFOAGA

Na tū le ofisa o le lālā i le taulaga o La Victoria. O lea, na matou filifili ai ma loʻu aiga e siitia atu i La Victoria ina ia latalata ai i le Peteli. O se suiga tele lenā mo i matou. Ou te matuā talisapaia le lagolagosua a loʻu aiga. Na avea lenā ma fesoasoani tele iā te aʻu. Na lotomalie loʻu tuafafine o Baha e tausia loʻu tinā. Ua faaipoipo Mike i le taimi lenā, ae o loo matou nonofo faatasi pea ma Samira ma Gabriel. O lo matou siitia atu i La Victoria, ua la tuua ai a la uō i Caracas. E faapena foʻi si aʻu avā pele o Sylvia, na taumafai o ia e faamasani i le olaga i se tamaʻi taulaga auā ua masani i se aai pisi. E tatau foʻi iā i matou uma ona faamasani i le nonofo i se tamaʻi fale. E tele mea na aofia i la matou filifiliga e siitia mai i Caracas i La Victoria.

Peitaʻi, na toe suia foʻi le tulaga o mea. Na faaipoipo Gabriel ma na mafai e Samira ona nofo na o ia i lona fale. O lea, na valaaulia ai i maʻua ma Sylvia e auauna i le Peteli i le 2007, o se faaeaga o loo ma olioli ai e oo mai i le asō. O la ma tama matua o Mike o loo auauna nei o se toeaina, ma o loo paeonia faatasi ma lana avā o Monica. O loo auauna foʻi Gabriel o se toeaina, ma o loo auauna i Italia ma lana avā o Ambra. Ua avea foʻi Samira o se paeonia, ma o loo auauna tauofo i le Peteli mai i lona fale.

OU TE LEʻI SALAMŌ I AʻU FILIFILIGA NA FAI

E tele ni filifiliga tāua sa ou faia i loʻu olaga, ae ou te leʻi salamō ai. Pe a toe iai se isi avanoa i loʻu olaga ou te faia ai se filifiliga, o laʻu filifiliga lava lea e fai. Ou te matuā talisapaia le tele o tofiga ma faaeaga faaleagaga na ou auauna ai iā Ieova. A o faagasolo tausaga ua ou iloa ai le tāua o le faatumauina o se faauōga malosi ma Ieova. E tusa po o ni filifiliga lāiti pe tetele e tatou te faia, ae e foaʻi mai e Ieova le filemu lea “e silisili i mea uma lava e manatu i ai.” (Fili. 4:6, 7) O loo ma fiafia ma Sylvia i le ma auaunaga i le Peteli. Ua ma iloa ua faamanuia e Ieova filifiliga ua ma faia i o ma olaga, o filifiliga e faamuamua Ieova i mea uma.